PALAHI na sab kita ning higayona, gikan sa trending kaayo nga isyu sa Philippine Charity Sweeptakes Office (PCSO), karon maghisgot na sab kita og mga pulong nga gitagik ning akong mahigugmaong hunahuna ug kasingkasing.
Diha'y panultihon ang sikat nga American novelist nga si Nicholas Sparks sa iyang nobelang At First Sight, "The emotion that can break your heart is sometimes the very one that heals it..." diin nagtuong anaa lamang ang kahupayan sa kasakit human sa unos sa gugma.
Sa kinabuhi sa tawo, kinahanglan anaa nagpasulabi ang gugma inay sa mga pagdumot, aron magpakabuhi kitang malinawon nga puno grasya ug sa way kinutuban nga pagsadya sa mga takna.
Ang usa ka romantiko nga magtatagik sa mga pulong, diha sa paghan-ay sa mga balaknong panghitabo sa kinabuhi, giingong sagad makasinati sila og tumang kasakit sa dughan nga sa kalit ihupay sa mga tawo nga anaa sa iyang palibot.
Bisan sa mga tawo nga anaa ang gamay nga pasensya, dali ra sab silang duawon sa takna sa kasadya pinaagi sa ilang mga kasinatian sa kagahapon. Sama ni Sparks, iyang sekreto ang paghigugma sa mga butang sa palibot nga angay'ng sabton bisan kasakit ang dala niini.
Kita sab, diha sa atong mga kasinatian, mao sab kini ang magsilbi nga mga butang aron kita makapadayon sa mga panghitabo sa unahan, -- sabton ang kasakit, di lung-an ang kalipay, magpasaylo ug maghigugma.
Giingon sab sa mga Sikolohista (Psychologists) nga makatabang sab ang paghinobra sa kasuko, aron sa ingon mapagawas ang hinobrang emosyon ug diha na mabati ang kahupayan human sa pipila ka gutlo.
Apan ang maong kasuko di maayong makit-an sa ubang tawo, sa mga anak, sa kapikas sa kinabuhi ug bisan sa mga hinigugma tungod makahatag kini og dakong impluwensya nga makapaubos sa pagsalig ug pagtuo sa uban.
Lahi sab ang kasakit sa dughan sa mga tawo nga "broken-hearted" nga kinahanglan og igong tambag gikan sa mga higala diin ipasabot ang tinuod nga kahulogan sa gugma.
Hinuon ang maong mga kasakit mao sab ang magsilbi nga suga, aron mahayagan kita padung sa lahi na sab nga mga panid sa atong kinabuhi uban sa daghang mga kabag-uhan.
Sa gugma, gustuhon man nato nga magpabilin sila sa atong kinabuhi, nga ang kamatayon lamang ang makapabuwag, apan kung moabot ang sayo nga panahon nga ilayo kita kanila, dawaton nato ang tanan, sabton ug lig-onon ang hunahuna, kay ang nahitabo maoy tinuod nga maghupay sa kasakit.
Ang pagsalig sa kaugalingon ug ang pagpangayo og kadasigan sa atong Diyos, maoy iwag sa atong dalan padung sa pakighimamat sa ubang tawo nga mamahimo natong makauban sa hangtud.