DIGOS CITY -- Gisugdan na sa Commission on Election (Comelec) ang rehistrasyon sa Sangguniang Kabataan (SK) ug Barangay Elections 2020 bisan og gipadayag na ni Presidente Rodrigo Duterte nga kinahanglang i-postpone sa Kongreso ang 2020 elections.
Nanawagan sab ang Comelec sa mga bag-ong botante nga pahimuslan ang kahigayonan sa pagparehistro sanglit aduna kini lugway nga duha ka bulan.
Nagsugod kagahapong adlawa ang rehitrasyon sa tanang buhatan sa Comelec diin matapos sa Septyembre 30. Giingong unom ka adlaw sa usa ka semana ipahigayon ang pagdawat sa rehistrasyon gikan alas 8:00 sa buntag hangtud alas 5:00 sa hapon, lakip ang holidays.
Sumala ni Abogada Jennifer Ancla, provincial election officer sa Davao del Sur, nga nalipay sila kay aduna nay mga nitubag sa panawagan nga magpa-rehistro.
"Unlike sa previous registration nga gilangaw ang first day karon na-aware na gyud ang atong mga botante," asoy ni Ancla.
Gitataw niini nga mas maayong moadto sa mga buhatan sa Comelec ang mga buot ma-rehistro samtang wa pa nagpunsisok ang katawhan.
Gawas nga hangtud adlaw'ng Sabado ang pagdawat og rehistrasyon, magbutang sab og satellite office ang Comelec sa mga barangay ug mga malls sa siyudad sa Digos.
Subay sa Comelec Resolution 10549, nakalatid nga ang matag molupyong Pilipino, ang mahimong maka-rehistro isip botante gikan 15-anyos alang sa SK ug ubos niini pa motuntong sa maong edad una moabot ang Mayo 11, 2020 ug unom ka bulan nang nanimuyo sa barangay sa di pa moabot ang adlaw sa eleksiyon.
Ang mga makaapil sa SK elections, mao ang mga nag-edad og 15 hangtud 30-anyos aron sila makaboto.
Hinuon, wa nay labot sa rehistrasyon ang mga nakaboto sa Mayo 13, 2019 mid-term elections.
Gidason ni Ancla nga prayoridad sab sa rehistrasyon ang mga "persons with disabilities, senior citizens" ug mga buntis.
Aron mas sayon ang pagparehistro mamahimong i-download ang form sa www.comelec.gov.ph.
Sayo niini, ang Comelec Manila nagbutyag nga gilauman nila nga adunay magparehistro nga kapin 2-milyones nga bag-ong botante.
Sa kasamtangan, anaa sa kapin 61 milyones ang mga local registered voters nga narehistro sa piliay karong tuiga. (OBD)