PADAYONG giukay sa otoridad ang tanang posibilidad sa motibo sa pagpatay sa usa ka chairman sa Purok Garcia, Barangay Mankilam, Tagum City alas 11:30 sa buntag, Huwebes, Agosto 1.
Ang biktima giila nga si Vevincio Loy y Enriga, 47, minyo, chairman sa purok ug molupyo sa maong lugar.
Nasayran nga alas 11:00 sa buntag kagahapon nakigmiting ang biktima sa iyang mga molupyo sa basketball court sa maong dapit.
Apan usa ka wala mailhing lalaki ang niabot ug way igong rason, gipusil si Loy makadaghang higayon hinungdan sa iyang kamatayon.
Gisulayan pa pagdala ang biktima ngadto sa Davao Regional Medical Center apan gideklarang dead on arrival alas 11:48 sa buntag sa samang adlaw ni Dr. Jagape.
Kapulisan nakarekober sa nahitaboan og upat ka (4) basiyo sa gituohang kalibre .45 nga pistola ug gisumite ngadto sa DNPCLO alang sa IBIS profiling.
Subay sa mga Facebook post sa mga netizen, giingong ang biktima may kalabutan sa pamilyang Garcia nga naghupot kaniadto sa Rigen Marketing.
Giingong ang asawa sa namatay, pag-umangkon ni Rose Garcia, inahan ni Rico Garcia ang unang CEO sa Rigen Marketing, una niya kini gibuhian, nahimo ng Rigen Wellness 2.0 nga kasamtangang gihuptan ni Paul Auditor. (WGM)