NITABANG ang miboluntaryong mga kawani sa Apo Cement Corporation (APO) sa pag-ayo sa mga kahimanan sa Naalad Elementary School sa dakbayan sa Naga mga 10 ka adlaw sa wala pa magsugod ang bag-ong tuig tigtungha.
Miuban sila sa mga magtutudlo pinangulohan ni G. Jared Revoltiado sa mga pamuhaton ug pagpamintal sa pipila ka mga lawak tunghaan ug sa social hall ubos sa diwa sa Bayanihan nga nagpaluyo sa programang Brigada Eskwela.
Matag tuig, tig-abagan ug tigsalmot ang APO sa tinuig nga National Schools Maintenance Week sa Department of Education uban sa tig-apod-apod niini’g mga minerales, ang Apo Land and Quarry Corp. (ALQC).
Ubos sa tema nga “Matatag na Bayan para sa Maunlad na Paaralan” karong tuiga, gipili sa APO ug ALQC ang publikong tulunghaan sa Barangay Naalad, usa sa ilang mga host barangay nga nahimutang dos kilometros gikan sa sentro sa dakbayan sa Naga. (PR)