GIHIMAKAK sa Bureau of Jail Management and Penology (BJMP-7) ang mga taho nga relibohan ang mga opisyal sa Mandaue City Jail.
Giingong reassignment lang ug di relibo ang pagbalhin kang jail warden Supt. Jessie Calumpang. Matod sa tigpamaba sa BJMP-7, Jail Chief Inspector Mary Jane Inopia, natayming lang ang tanan tungod sa pag-irog sa mga assignment.
Kini tungod sa hingpit nga pagbalhin ni BJMP -7 Assistant Regional Director, Jail Supt. Jolly Taguiam ngadto sa kauluhan.
“Nataymingan lang gyud nga na move nya transfer lang gyud dili relibo. Nagkataon nga usa sa mga ranking si Calumpang nga naapil sad sa movement”, matod ni Inopia.
Gipahibaw sab ni Inopia nga wa pay order nga ibalhin usab ang mga jail guard tungod kay nagpadayon pa ang imbestigasyon sa pagpatay kang Romy Ramas niadtong Lunes, Hulyo 29, sulod sa pasilidad.
Sa miaging adlaw, nipadayag na si Calumpang sa iyang ka andam kon relibohan siya ug ang iyang mga kauban.
Matod pa niya kabahin na kini sa ilang trabaho.
Sa pagsuwat niining balita, epektibo na ang pagbalhin ni Calumpang ngadto sa Lapu-Lapu City Jail –Male dormitory samtang mohulip kaniya sa Mandaue City Jail mao si Jail Supt. Gil Inopia Jr. nga warden usab sa prisohan sa Medellin.
Si Calumpang 24 na ka tuig sa serbisyo ug nadestino sa Mandaue City Jail sa miaging tuig. (ANV)