SECTIONS
Tuesday, September 17, 2019
SUPERBALITA CEBU

3 ka 'rebeldeng NPA' nasikop; police killers?

REBELDE? Sila si Danny Harold Tancinco, Ronnie Herebias ug Marlon Basalo, gikatahapang mga rebeldeng komunista nga nadakpan sa Badian Police, giingong nangangkon nga apil sa ningpatay sa upat ka mga pulis sa lungsod sa Ayungon, Negros Oriental. (Tampo sa PRO 7)

TULO ka gikatahapang mga sakop sa New People’s Army (NPA) nasikop sa kapulisan sa lungsod sa Badian pasado ala 1 sa Miyerkules sa hapon, Hulyo 31, sa ilang pagtabok gikan sa lungsod sa Ayungon, Negros Oriental padung sa southern Cebu, sakay sa usa ka motor banca.

Ang tulo ka mga suspek nakuhaan og mga armas, eksplusibo, bala sa nagkadaiyang kalibre sa armas, linibo nga kwarta ug subersibong dokumento.

Giila ang mga dinakpan nga silang Danny Harold Tancinco, Ronnie Herebias ug Marlon Basalo base sa ilang gihatag nga mga ngan ngadto sa mga pulis.

Ang tulo giingong niangkon nga apil sa ningpatay sa upat ka mga pulis sa lungsod sa Ayungon.

Apan matod ni Police Regional Director Police Brigadier General Debold Sinas nga wa makapakita ang tulo og identification cards nga maoy hinungdan nga ila pang ipaubos sa confirmation kon tinuod ang gihatag nila nga mga ngalan.

Sa imbestigasyon sa kapulisan sa lungsod sa Badian nga mga alas 11 sa buntag niadtong Miyerkules, nakadawat silag report gikan sa usa ka Barangay Intelligence Network (BIN) gikan sa Negros Oriental nga adunay tulo ka tawo nga luwan sa usa motor banca nga magpahatod sa usa sa mga beach resort sa lungsod sa Badian.

Dali nga giandam sa Badian police ang ilang mga sakop aron kompirmahon ang impormasyon nga nasagap.

Nianang pagka ala 1 sa hapon sa susamang adlaw, ilang nakita ang motor banca nga gihulagway sa BIN sa Negros nga padung na nga modunggo sa Lambog beach.

Dali nga nakaposisyon ang mga pulis ug ilang nakita ang tulo ka sakay nga naka backpacks.

Nabantayan usab nila nga mga armado kini.

Sa pagdunggo, dali usab nga ningsibat ang motor banca pabalik sa gigikanan samtang ang tulo yano lamang kini nga nagbaktas sa baybayon.

Dinhi na nila gi urpresa pag tion sa dala nilang armas ug nagpaila sila nga mga pulis.

Wa na makalighot ug wa na makakuha sa ilang mga armas ang mga suspek.

Si Tancinco nakuhaan og usa ka kalibre .38 nga revolver nga dunay upat ka mga bala, duha ka rifle grenades ug subersibong dokumento.

Si Herebias nakuhaan usab og kalibre .45 nga pistola nga adunay usa ka magazine, lima ka mga bala, P9,000 cash, granada, tactical maps, relo, subersibong dokumento ug personal nga gamit.

Samtang si Basalo nakuhaan usab og .38 kalibre nga armas nga adunay lima ka bala, duha ka 40MM M203 nga bala ug kwarta nga moabot sa P7,460.

Matod ni Police Brigadier General Debold Sinas nga miangkon ang tulo nga sakop sila sa NPA, nga lakip sa nakapatay sa upat ka mga pulis sa lungsod sa Ayungon Negros Oriental.

“Niangkon na man ni sila kon kinsa ni sila. Tapos nianhi daw sila kay init na kaayo sa Ayungon kay daghan na kaayo ang operation ug daghan na ang nangadakpan didto mao nang nanganhi daw sila diri para pag pahulay,”matod ni Sinas.

Sa tulo, matod sa heneral, duha niini striking force sa NPA, diin ang ilang target ang mga pulis ug sundawo.

Human sa pagkasikop sa tulo, nagtuo si Sinas nga aduna pay lain nga nakasulod na usab.

Giklaro hinuon ni Sinas nga way angay ikaalarma sa publiko sanglit kontrolado sa kapulisan ang kahusay ug kalinaw.

Gimandoan usab niya ang iyang mga sakop nga ilang isaka ang intelligence monitoring aron di malutsan sa mga rebelding komunista.

Gitakdang pasakaan og kaso ang tulo nunot sa nakuhang mga armas gikan sa ilang posisyon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph