Planong 'Xavier City' gipresenta

GIPRESENTAR mismo sa Presidente sa Xavier University ang masterplan alang sa proyekto sa planong pagbalhin sa campus sa Xavier University nga nauyonan sa developer nga pagatawgon nga "Xavier City."

Kini lakip sa strategic plan sa Jesuit University nga mamahimong pinaka labing maayo nga Unibersidad sa Mindanao ug sa nasud ilabi na nga i-selebrar na sa Xavier Ateneo ang ika usa ka gatos ka tuig o centennial sa tuig 2033.

Kinahanglan una nga makakuha og panugot ang unibersidad sa board of trustess ug ni Jesuit Father General nga si Father General Fr. Arturo Sosa aron nga ang maong planong proyekto hingpit nga mapatuman ug masugdan diin molungtad kini ngadto sa walo ka tuig hangtod sa napulo kung ugaling.

Samtang sa gipagawas nga pahayag ni Sosa positibo ang panglantaw niini diha pagbalhin apan nibutyag nga angayang sutaon una ug kinahanglan ang konsultasiyon ayha kini mohatag sa hingpit nga desisyon kung aprobahan ang maong suhestiyon

Buot ni Yap nga iduso sa umaabot nga bulan sa Sityembre ngadto na mismo kay Sosa ug naglaom sa tubag niini sa dili pa matapos ang tuig 2019.

Tumong sa maong proyekto nga mag-develop og bag-ong campus sa Xavier University diha sa 63 ektarya nga properidad sa Manresa diha sa Uptown ning siyudad.

Ubay-ubay usab ang angayang i-konsidera sa tinugyanan sa maong unibersidad sama na lamang sa heritage concerns gani dunay mga i-replika sa daan nga campus kung ugaling kini mabalhin.

Gidugang pa nga girespeto niini ang history apan dili usab mamahimong magpabilin ilabi na nga tumong sa unibersidad nga mamahimong pinaka labing maayong unibersidad sa Mindanao ug sa tibuok nasud.

"Heritage is important, we recognized that at the same time we're saying we need to do balance," matud ni Yap. But we cannot stay in the past, we should look to the future,” dugang pa.

Samtang bisan pa man sa mga maanindot nga plano ug tumong nag-agad gihapon kini sa panugot sa Fr. General apan niingong i-presenta niini ang pinaka labing maayong plano alang sa maong Xavier City.

“If he will say no, then we can’t do anything about it," matud ni Yap.

Ang maong proyekto nagkinahanglan og P5.2 bilyones alang sa duha ka phase sa maong proyekto ug sa 1st phase kinahanglan og P3.5 bilyones aron hingpit nga makamugna og bag-ong campus sa uptown samtang ang ikaduha P1.7 bilyones aron hingpit nga ma kumpleto.

Giklaro usab ni Yap nga ibilin ang 2 ka ektarya sa kasamtangang Xavier University campus nga anaa sa Divisoria samtang ang 4 ka ektarya ibaligya sa Cebu Landmasters Inc. ug himoong Central Business District. Ibaligya usab ang 14 ektarya sa 63 ka ektarya usab sa Manresa ug posibleng mahimong University Township.

Sa duha ka ektarya nga mahabilin sa XU sa Divisoria magpabilin ang simbahan, graduate studies, college of law ug medicine.