DILI na modawat ang Commission on Elections og barangay clearance, cedula ug police clearance isip basehanan sa pagparehistro sa botante sa barangay ug Sangguniang Kabataan elections sa Mayo 2020.
Sumala ni Ferdinand Gujilde, election officer, nga gi-detail sa Office of the Provincial Election Supervisor, dili ma-categorize nga balido nga ID ang barangay clearance, cedula ug police clearance.
“Ang barangay clearance duna man gud reports before nga ang barangay clearance mahimo nga vulnerable to abuse siya especially kon padung sa barangay ug SK elections kay kinsa may moisyu sa barangay clearance? Taga barangay. Kinsay molansar sa barangay? Ang incumbent barangay officials,” matod ni Gujilde.
Matod niya, dili na bag-o ang dili pagdawat nila sa barangay clearance, cedula ug police clearance kay sa una pa kini nila gipatuman, apan ila nalantawan nga duna gihapoy magdala niini.
Sigon niya ang balido nga ID kay giisyu sa gobiyerno nga dunay hulagway, pirma ug authorized signatory sa buhatan.
Apil sa balido nga mga ID nga dawaton sa Comelec sa pagpangrehistro kay student ID o library ID, employee’s ID, postal ID, senior citizen’s ID, driver’s license, National Bureau of Investigation clearance, passport, ug IDs nga giisyu sa Social Security System, Government Service Insurance System ID, Integrated Bar of the Philippines ug Professional Regulation Commission.
Kon pananglit wa gyuy ID ang tawo, mahimo siyang barugan sa usa ka kabanay hangtod sa ikaupat nga civil degree sa consanguinity o affinity, nga mobarog sa iyang pagkatawo.
Si Gujilde nidugang gipaabot nila nga modagsa ang mga gusto magparehistro sa mga siyudad sa Sugbo, Lapu-Lapu ug Mandaue tungod kay daghan ang nanimuyo niini kon itandi sa kalungsuran.
“After this week, mo-subside siya then mobalik siya nga peak na pud, probably two weeks prior to the deadline,” dugang niini.
Nalangan
Nakasinati og kalangan ang pipila ka mga residente sa dakbayan sa Sugbo atol sa unang adlaw sa rehistrasyon, Huwebes, Agusto 1.
Gani naglinya gawas sa buhatan sa Comelec ang pipila nga gusto nga makarehistro tungod kay duha ka buwan lang kini.
Sa Comelec Cebu City North District Office nagpunsisok ang tawo human nga wa mogana ang signature pad sa computer nga nakakonektar niini.
Si North District Election Officer Atty. Marchel Sarno nagkanayon nga dili compatible ang peripheral signature pad sa ilang computer diin dali silang nangayo og tabang sa Comelec Province aron ayuhon kini.
“Wala pa na-upgrade ang peripherals sa computer, signature pad raman. In fact, na-fix naman, usa pa lay na-fix duha na ang nag-function”, si Sarno nagkanayon. Nipasabot usab kini nga daghan gyud og tawo basta unang adlaw ug uwahing adlaw sa registration.
Lakip sa gidawat karon sa Comelec katong mga first time magparehistro, transfer of registration, correction of entry ug reactivation.
Si Wilfredo Bolotano, 42 anyos kinsa residente sa barangay Tinago, alas 7 sa buntag naglinya na sa Comelec kagahapon aron ilisan ang nasayop niya nga birth date apan ala 1 na lang sa hapon wala pa kini makasulod sa buhatan sa Comelec.
Kagahapon, Agosto 1 gisugdan ang registration sa Comelec ug mahuman sa Septiyembre 30, gikan sa alas 8 sa buntag hangtod sa alas 5 sa hapon, Lunes hangtod Sabado apil na ang mga holiday.