MOABOT sa P4.4 Milyon nga balor sa drugas ang nasakmit sa Carbon Police Station sa duha ka anti-drug operation nga gihimo sa manag lahing lugar sa Dakbayan sa Sugbo.
Nahitabo ang unang operasyon sa M.L. Quezon Boulevard, Barangay Ermita alas 7:30 sa gabii, Biyernes, Agosto 1, 2019, nga gipangulohan sa hepe sa Carbon Police Station nga si Police Captain Alvin Llamedo.
Ang nasikop giila nga si Giovannie Mirnilo Mancao, alyas "Dodong," 18, taga Sitio Buli, Barangay Duljo Fatima, Dakbayan sa Sugbo.
Nakuha kaniya ang usa ka dakong putos nga gi-wrap sa packaging tape nga aduna'y daghang pinutos sa gituohang shabu nga motimbang sa 500 gramos ug mobalor ang tanan sa P3,440,000.
Usa ka pulis nga nagpatuo nga kustomer ang mipalit kang Mancao gamit ang usa bundle sa boodle money ug sa dihang nakatunol nga nagpaila dayon siya nga pulis ug gidakop si Mancao.
Gipaubos sa imbestigasyon ang suspek aron masayran kinsa ang tig suplay sa ilegal nga drugas ngadto kaniya.
Nalakip si Mancao sa high-value target sa Carbon Police Station.
Pagka alas 10 sa gabii, ilang girombo ang usa ka drug personality sa Sitio Climaco, Barangay Pahina Central nga miresulta sa pagkasikop ni Sanny Bermudez, alyas "Sanny Boy," 21, taga Jones Avenue, Barangay Sta. Cruz, Dakbayan sa Sugbo.
Nakuha sa dinakpan ang unom ka dagkong pakete sa gituohang shabu nga motimbang og 140 gramos nga mobalor sa P950,000.
Tungod sa pagkasikop kang Mancao ug Bermudez, gipahalipayan sa hepe sa Cebu City Police Office Police Colonel Gemma Vinluan nunot sa maong kalampusan. (Superbalita Cebu)