MOABOT sa kapin 20 ka mga trabahante sa dakung himuanan og bihon ug pancit sa Barangay Cansojong ang nituyo na sa buhatan sa City Social Welfare Office (CSWO) sa dakbayan sa Talisay ganihang Biyernes sa buntag, Agusto 2, aron magpatabang human nasirado na ang ilang trabahoan.
Sa pagbukas pa lang sa buhatan sa CSWS ganihang alas 8 sa buntag, nidagsa ang pipila sa mga trabahante sa CitiFood Industries ug President Food, kini aron pagpangayo og tabang nga mahatag ang kagamhanan.
Niadtong Huwebes, Agosto 1, nipirma si Talisay City Mayor Gerald Anthony "Samsam" Gullas ug closure order ngadto sa dakung pabrika sa pansitan sa barangay Cansojong human kini giingon nakalapas sa lagda sa Department of Energy (DOE) tungod sa pagkawat ug P33 milyones nga balor sa uling.
Kasagaran sa mga trabahador nga niduol sa CSWO mga gikan pa sa trabaho ug mga night shifter nga nabalaka usab sa ilang ugma.
Sila Francisco Anito nga taga Negros Oriental ug si Juvel De Luna taga Zamboanga del Sur ang gikan pa nigawas sa ilang trabaho isip night shifters aron mulahus sa CSWO.
Si Anito ang tulo ka tuig na sa trabaho, samtang si De Luna ang upat na ka tuig.
Nitug-an ang duha nga nahadlok sila kon unsa nalang ang ilang ibuhi sa ilang pamilya ning pasirad-an ang gitrabahuan planta.
“Naguol gyud mi kay wala nami trabaho, giingnan, ra man mi, naa ra namu kon motrabaho pa mi or dili, kay gipasirad-an na sa government,” saysay ni Anito.
Apan sa ilang pagduaw, wala silay nakuha kay gitambagan lang una sila sa pangulo sa CSWS nga si Felipa Solana sa pagkompleto sa gikinahanglang rekisitos, aron mahatagan sa pinansyal nga hinabang.
Gikinahanglan nga makahatag sila og certification sa barangay diin sila nagpuyo, certification of employment ug identification card sa ilang pagtrabaho sa bihonan.
Tukion pa usab hinuon sa ilang buhatan uban ni Gullas, kon pila ang ihatag nga pinansyal nga hinabang.
Apan pasalig sa CSWS nga kon makompleto lang ang gikinahanglang rekisitos, mahatag usab dayon sa kagamhanan ang hinabang.