NAKATUTOK si Talk N’ Text import Terrence Jones sa iyang tinguha nga maagak ang KaTropa sa kampiyunato sa Philippine Basketball Association (PBA) Commissioner’s Cup taliwala sa taho nga kuhaon siya’g balik sa Houston Rockets sa National Basketball Association (NBA).
Gipasabot ni Jones nga ning puntoha, wala pa niya hatagi og gibug-aton ang pagbalik og duwa sa NBA gumikan kay nakatutok pa siya sa iyang obligasyon sa KaTropa.
Adunay artikulo sa The Athletic nga gisuwat ni Kelly Iko, kinsa naghulagway kang Jones nga “umaabot” nga magduduwa sa Rockets.
Nagpasabot lang kini nga manugbalik na si Jones sa team nga nagpili kaniya isip 18th overall pick niadtong 2012 NBA draft.
Nagduwa si Jones sa Rockets gikan niadtong 2012 hangtod 2016 unya mitapon kini sa New Orleans Pelicans niadtong 2016 ug Milwaukee Bucks niadtong 2017. Mibalik si Jones sa Rockets niini lang tuiga.
Gitataw ni Jones nga determinado siyang magbilin og kampiyunato sa KaTropa sa dili pa siya moduwa’g balik sa NBA.
Sa pagpangulo ni Jones, nakasulod sa finals sa Commissioner’s Cup pinaagi sa 103-92 nga kadaugan batok sa defending champion Brgy. Ginebra Gin Kings sa Game 4 niadtong Huwebes sa gabii nga maoy nagtuldok sa ilang semi-finals best-of-five series, 3-1.
“You know, I’m not really focused on that,” matod ni Jones kabahin sa iyang pagbalik sa NBA.
“As a player playing in the championship, I can only focus on the task at hand and that’s winning the championship here.”
Sa Game 4, si Jones ningmugna og 24 puntos, 13 rebounds ug 10 assists nga maoy iyang ikalimang triple-double sa Commissioner’s Cup.
Sa finals, ang KaTropa maghuwat na lang sa molampos sa laing semi-finals series tali sa San Miguel Beermen ug Rain or Shine Elasto Painters.
“Off to the next round. We have to be ready kung sino makakalaban namin. It won’t mean anything kung hindi namin itutuloy,” matod ni TNT coach Bong Ravena.
Mihatag og dakong suporta kang Jones sa Game 4 mao sila si Troy Rosario ug Jayson Castro.
Si Rosario nagpakatap og 22 puntos ug 11 rebounds samtang nihatag og 20 puntos si Castro.
Ang Gin Kings gipangulohan nila ni import Justine Brownlee ug Japeth Aguilar pinaagi sa ilang 27 puntos matag usa.
Puntos matag usa
Talk N’ Text (103) – Jones 24, Rosario 22, Castro 20, Pogoy 14, Heruela 9, Trollano 6, Reyes 6, Taha 2
Ginebra (92) – Brownlee 27, J. Aguilar 17, Pringle 15, Devance 13, Tenorio 5, Thompson 3, Caguioa 2, Slaughter 0. (ESL)