NAGBANSIWAG ang banner story sa niaging Huwebes sa Super Balita,nga naghisgut sa kamanduan sa Land Transportation Office sa paghawan Natalio Bacalso Ave. batok sa bisan unsa nga obstruction. Ang coverage sa maong kamanduan nanukad sa lungsod sa Santander lahos sa ciudad sa Bogo. Sentro sa kamanduan mao ang mga tag-iya og sakyanan nga gihimo na nga parkinganan ang daplin sa karsada.
Kini nga talan-awon di malilong sa mga magbiyahian padung sa norte ug habagatan. Nagkadaiyang matang sa sakyanan ang giparada. Kong imong susihon, kadaghanan sa mga tag-iya naa ra nagpuyo sa duol. Duna say mga truck nga magparada og adlaw. ug gabii nga puno sa kargamento. Mahibung ka nganong ang uban mabuntagan. Ang sagad nga rason kay nadautan. Ang record sa trapiko nagpakita nga daghang kinabuhi ang nakalas human madasmag ang ilang sakyanan sa giparada daplin sa highway. Nunot sa maong kamanduan nangutana ang mga nagpakabana sa ubang dapit, Natalio Bacalso Ave. ra diay?
Ang akong sabot sa nahaunang kamanduan sa Department of Interior and Local Government kun DILG, ang tanang mayor gisugo paghawan sa tanang karsada lukop nasod. Di kay highway lang apil na ang mga suok-suok diha sa kabarangayan. Sa implimentasyon sa maong kamanduan unta wagtangon na ang kumparehay ug ubang konsiderasyon. Lisod kong sakyan og pamolitika. Samot na kong ang mga naa sa gahum ang nag-una sa listahan sa mga violator.
•••
Si Kagawad Lolot Tulda ang Chairman ni Kapitan Litang Abarquez sa Committe on Transportation sa Barangay Poblacion-Pardo, Cebu City, nitug-an nako gahapon nga napahapsay na nila ang Natalio Bacalso Ave. habig sa ilang barangay.
Nag-una niini ang atubangan sa simbahan ug public market. Pero dason niya, nga duna pa kini kulang. Unta ang silingan nila nga Barangay nga mao ang Kinasang-an, maghimo sab og mga lakang pagpahapsay sa ilang dapit aron nga mosutoy ang gipangkabya nga mga sakyanan gikan sa Poblacion Pardo. Himuon kini matag alas 6 sa buntag hangtod sa alas 9. Unya alas 4 sa hapon hangtod sa alas 8 sa gabii. Nindot ning sugdan na karon aron di ta mangapasmo kay naghinangat na ra ba ang kapistahan sa Pardo.
•••
Panghinaot alang sa dali nga pag gawas sa hospital atong ilunod ngadto kang Jojo Satuita, ang akong cameraman kaniadto sa ABS-CBN. Atol nga magdala siya og basketball sa ilaha sa Carcar City, na slide siya og naputol ang usa ka bahin sa iyang tuhod nga gitawag og patellar tendon. Get well soon Jo!