MO UYON ka ba nga mas sayon ang pagpatambok kaysa pagpagamay? Mas gasto sab ang pagpa-menus sa timbang kaysa padako, di ba? Mokaon ka lang og unlimited rice o kanunay mo-inum og softdrinks, seguradong paspas moburot ug ma overweight.
Matod sa inilang mananambal nga si Dr. Willie Ong, dunay mas sayon nga mga paagi aron madali ang pagpahiyos sa lawas nga di na kinahanglang mo inum og mga pangpa-slim nga ilimnon.
Kini nga diet nagtudlo sa pagkaon og daghang protina unya gamyon ang carbohydrates kon ‘High Protien, Low Carbs Diet.
Pasabot, hinay-hinayan og pagamyan ang mga pagkaon nga daghang starch ug kamay sama sa kan-on, noodles/spaghetti, pan, patatas, kamoting kahoy, kamote apil ang lamian nga French fries ug subra ka tam-is nga prutas sama sa grapes ug manga.
Daghanon hinuon ang pagkaon niadtong daghan og protina sama sa unod sa baka, baboy, kanding (nga kinuhaan na og tambok), isda, manok, tuna, cheese, tufo, itlog, monggos, sitaw og mga nuts. Ang kaayo ining protina kay di ka dayon daling gutumon gawas nga makatabang kini pagpadako sa kaunuran.
Sunod, daghanon ang pagkaon og mga nuts, utanon ug prutas sama sa kamunggay, talong, kalbasa, tangkong, kamatis, saluyot, amamakol, carrots, cauliflower, cucumber, peppers, repolyo lakip mga prutas sama sa saging, mansanas, oranges, pomelo, pinya og uban pa.
Makapagamay sab ang pag-menus sa pagkaon og mga bake products sama sa pan, cakes, cookies ug ilimnong daghang kamay (softdrinks).
Ang pag-ehersisyo nga makapasingot sama sa paglakaw o brisk walking, sayaw, aerobics, jogging maka patunhay sa serkulasyon sa dugo sa kaugatan ug kasing-kasing. Gawas ini, sunugon o tunawon sab ini ang dautang tambok sa lawas.
Kung ihulagway, unsa naman la’y hitsura sa imong kan-unon sulod sa plato para sa pamahaw, pani-udto og panihapon?
Imbis ang naandang nagla-undok nga kan-on, bahinon na kini bali og ¼ na lang sa plato, ¼ sab ang karne nga sud-an, unya katunga kon ½ ang mga utanon ug prutas.