ANG Cebu City Government, pinaagi sa City Legal Office, nihatag na og rekomendasyon sa pagpapadayon sa contractor sa pagtukod sa Police Station 7 sa Cebu City Police Office sa Barangay Inayawan.
Si Atty. Rey Gealon, pangulo sa Cebu City Legal Office, nipabor nga maisyuhan na og locational clearance ang DSJP Construction uban sa pagkumpleto sa ubang gikinahanglang mga rekisito gikan sa City Planning and Development Office (CPDO) aron sa pagkuha og building permit gikan sa Office of the Building Official (OBO).
Si Engr. Joel Reston, pangulo sa CPDO, nangayo og legal opinion sa buhatan ni Gealon labot sa aplikasyon para sa locational clearance sa three-story police station sa Inayawan.
Ang pagtukod sa police station nakontrobersiya.
Niadtong 2017, ang Barangay Inayawan ubos sa pamunoan ni kanhi barangay kapitan Lotlot Ignacio-Soon ni-donate sa 566-square meter nga lote ngadto sa Philippine National Police.
Ang lote nahimutang duol sa barangay hall.
Apan dihang gipilde si Ignacio-Soon sa barangay election niadtong Mayo 2018 ug nidaog si Atty. Kirk Bryan Repollo, gibakwi sa bag-ong administrasyon ang approved resolution sa donasyon pinaagi sa pagpasar og laing resolution.
Rason ni Repollo nga makadugang sa kahuot sa trapiko ang police station nga gipundohan na sa Police Regional Office (PRO) 7 og P5 milyones para sa konstruksyon apan wa makapadayon.
Ang DSJP Construction nipadala na sa ilang kahimanan niadtong 2018 ug nikoral sa propiedad isip preparasyon sa pagtukod, apan wa sila gitugotan nga makasugod.
Sayo niining tuiga, si Repollo ug mga barangay tanod niguba sa perimeter fence sa construction site para subling magamit ang dapit sa publiko.
Si Repollo nihatag og laing lugar nga duol sa sports complex apan wala mosugot ang PNP kay ang dapit di paigo ang standard lot area sa police station.
Si Repollo kaalyado sa Bando Pundok Kauswagan (BOPK) nga gipangulohan ni kanhi mayor Tomas Osmeña, kinsa kritikal sa kapulisan. (PAC)