BAG-ong warden sa Mandaue City Jail, Supt. Gil Inopia, nakuratan sa kalit nga pagbalhin kaniya.
Matod ni Inopia nga mas challenging karon ang iyang trabaho gumikan sa presko pa nga panghitabo sa pagpusil kang Romy Ramas sulod sa prisohan.
“Supposedly gahapon ang effectivity, nya gahapon (Huwebes) pa ta gitawagan. So, wa gyud ta makaingon nga nakapangandam. Nagkuha ra ta og unsay mabitbit nato kay kalit kaayo,” matod ni Inopia.
Sa turnover ceremony sa BJMP-7, nagkasabot na sila ni Calumpang nga sunod semana na siya hingpit nga molingkod.
Uban kang Calumpang, tanang 60 ka mga personnel sa BJMP nga naglangkob sa mga jail officers ug office staff relibuhan sa katungdanan.
Hinuon, di diha-diha ang pagpuli kanila kay batches kini.
Gikinahanglan pa nilang bansayon ang mopuli kanila sa jail una pa sila pulihan.
Nakasuway na
Di na bag-o si Inopia sa Mandaue City jail tungod kay na-assign na siya kaniadto sa 2014-2016.
Naghuna-huna na siya og mga lakang nga buhaton aron mahimong hapsay ug luwas ang mga piniriso.
Lakip na sa iyang gikalisdan mao ang pagtaas sa gidaghanon sa mga piniriso.
“Kon unsa ang atong nakita sa atong previous assignments nga naa poy mga challenges nga ingon ana, mao toy atong i assist ang situation... Kon unsa may angay natong buhaton, I will make some adjustments. Depende pag-abot nato sa jail kon unsa atong makita. If kinahanglan nga mas higpitan, ug naa bay angayan i-change sa duty, ato na himuon,” dugang ni Inopia.
Mohulip kang Inopia sa Medellin mao si Supt. John Conrad Basilio.
Apektado ang dalaw sa pamilya sa mga piniriso matag sa Martes, Huwebes, Sabado ug Dominggo gumikan sa pagbalhin sa mga opisyal.
Si alyas “Gaga,” taga brgy. Pagsabungan, buot unta mobisita ug mohatod og grocery items sa iyang anak sulod sa prisohan.
Abiso na lang nga gipapilit sa gawas sa gate sa prisohan ang niabi-abi kaniya.
“Maghatod man unta ko sa akong mga grocery sa akong anak unya mao naman lang na akong nakit-an nga di na man gyud mi pasudlon. Wa man sab mi mahimo. Balik nalang ko kanus-a”, matod ni Gaga.