ZERO-growth kun wa nay madugang nga sidewalk vendors ang policy nga hugot nga ipatuman ni Prevention Restoration Order Beautification and Enhancement (PROBE) chief, Raquel Bohol Arce, aron sa paghapsay sa kadalanan ug maminusan ang mga namaligya kilid sa karsada sa Siyudad Sugbo.
Ang Probe subsob nga nagpahigayon og mga operasyon sa kadalanan sa Dakbayan sa Sugbo aron paghawan sa mga karsada.
Ubos kini sa mando sa Department of Interior and Local Government (DILG) nga hawanan ang mga karsada sa nakababag. Pagpaluag kini sa trapiko nga usa sa mga dakong suliran sa kagamhanan karon.
“Under the policy nato, kay zero growth policy naman ta, dili na ko mo-cater og new vendors, in the sense nga wala mana nagtubo ang atong sidewalk. So, dili sad nato patubuon (gidaghanon) ang vendors,” matod ni Arce sa Superbalita Cebu.
Ang tugtan nga makabalik kadto lang mga narehistro sa Gugmang Alyansa Sumbanan sa Asenso (Gasa), gikan sa 2016 paubos ug katong makatuman sa mga requirements nga gipangayo.
Pipila sa rekisitos mao ang: dili molapas sa gikatakdang oras sa pagpaninda; hipuson ang mga lamesa ug uban pang mga gamit inig human og paninda; dili molapas sa 2x2 nga sukod sa lamesa; dili mogamit og folding bed isip displihan sa tinda; dili mag hiklad o maglad-lad sa mga paninda sa sidewalk o kalsada; dili mogamit og dagkong payong o tent; dili mogamit og liquified petroleum gas (LPG) o butane gas ug uban pa.
Ang vendors nga wa nakaparehistro sa maong mga tuig di na makabalik, apan irekomendar sila sa laing association ug sa Division for the Welfare of the Urban Poor (DWUP). (Myla Tabio ug Cathleen Sumayang CNU Comm Interns.)