DUHA ka giingong drug personalities sa lungsod sa Consolacion gisaka og wa mailhing mga tawo sa ilang balay samtang nahinanok sa pagkatulog dayon gipamusil patay mga alas 3 sa Biyernes kaadlawon, Agusto 2.
Nahitabo kini sa sitio NQ, District 7, Barangay Pulpogan, lungsod sa Consolacion.
Matod ni Police Major Verniño Noserale, hepe sa Consolacion Police Station, nakaangkon og mga pinusilan sa lawas ug ulo ang mga biktimang sila si Lexter Emnasi, 27, giingong taga Siyudad sa Sugbo ug Jofer Bohol Amancio, 37, nagpuyo sa dapit.
Wa giapil sa mga killer ang live in partner ni Emnasi nga giingong naa ra sa sulod sa balay natulog.
Usa ka concerned citizen ang nanawag sa police station alas 3:30 sa kaadlawon nga nipahibawo nga adunay gipamusil sa Pulpogan.
Sa pag-abot sa mga pulis sa sulod sa balay, mga biktima nagbuy-od nang patay, kinsang mga lawas natusak sa mga bala.
Way bisan usa ka saksi ang nihatag og impormasyon sa kapulisan labot sa krimen.
Buto-buto lang sa armas ang ilang nadunggan, apan matod ni Noserale nga di siya makatuo nga way nakakita sa hitabo kay nagtapok ang balay sa dapit.
Sa background investigation, nasuta nga si Amancio nasikop na niadtong Hulyo 2017 sa kasong illegal nga drugas.
Nakakuha ang mga imbestigador sa Consolacion ug Scene of the Crime Operation (SOCO) og mga basiyo sa bala sa kalibre .45 nga pistola sa sulod sa balay.
Drugas ang usa sa gitan-aw nga motibo, apan wa nila wad-a ang posibilidad nga personal nga atraso ang hinungdan.
“Pati ang mga silingan sa area atong gipa-interview sa investigator medyo hesitated pa mohatag sa information, ”matod ni Noserale.