MIDSAYAP, North Cotabato -- Wa damha sa upat ka mga panday nga ang ilang paglingaw-lingaw moresulta sa trahedya human sila gipamusil sa wala mailhing mga suspek.
Nahitabo ang pagpamusil alas 9:15 sa gabii, Huwebes, Agosto 1, samtang nag-inom ang upat sa balay sa namatay nga si Ronald Mallari, 44, minyo.
Ang laing tulo nga samdan ug giingong kritikal giila nga sila Marius Dondon Hernane, 45, Mike Casildo Gumayao, 64, ug Michael John dela Cruz Gumayao, 36, mga molupyo sa Barangay Salunayan, Midsayap, North Cotabato.
Nasayran gikan kang Midsayap chief of police Lieutenant Colonel Benito Rotia nga nag-inom ang mga biktima sa balay ni Mallari sa diha nga kalit mibutho ang duha ka mga suspek ug gipamusil sila.
Patay on the spot si Mallari human maigo sa ulo ug dughan nga giingong posibleng maoy puntirya sa mga suspek.
Samtang mga samdan dali nga gihatud ngadto sa Amado Diaz Provincial Foundation Hospital ug talandugon ang kahimtang.
Mga suspek daling nisibat human sa hitabo sakay sa motorsiklo. (Edgar E. Fuerzas)