NATAPOS na pag-otopsiya sa patay’ng lawas sa bag-ong graduate nga dalagita nga giingong nagpakamatay sud sa ilang balay niadtong Huwebes, Agosto 1, sa Saint John, Barangay 76-A Bucana Davao City.
Ang biktima mao si Rica (bansagon gipatago), 20-anyos, dalaga, fresh graduate sa kursong Accountancy ug bag-o lamang nahimong Certified Public Accountant (CPA).
Subay sa impormasyon gikan sa Davao City Police Office (DCPO) nga napalgan na lang nga nagbitay ug wala nay kinabuhi ang biktima gamit ang pisi nga gihikot sa liog sud sa ilang kuwarto.
Pag-abot sa miresponde nga mga personahe sa Central 911 ambulance, gideklara nga patay na ang biktima.
Sa mga komentong mikatag sa social media, dunay mga nag-comment nga posible nga naguol ang biktima human nga alegasyong biktima kini sa lugos sa ilang dapit.
Sa pagpanubay sa Superbalita Davao sa Scene of the Crime Operative (Soco), gikanayon ni Regional Crime Laboratory Office (RCLO)-Davao medico legal officer Police Chief Inspector Dr. Nolan Genova nga imposible nga hikog ang nahitabo sa dalaga.
“Imposible siya na suicide, kay sa iyaha daghan siya og bun-og sa ulo ug arm niya may blood coma siya sa ulo na posibleng gihampas, giparok og hard object,” pagklaro ni Genova.
Gidugang sab niini nga negatibo ang giingong na-rape ang dalaga.
Gibutyag hinuon niya nga posibleng gisuwayan og lugos ang biktima.
“Possible may attempt na rape, pero basin nanlaban siya mao nga gipatay na lang siya.”
Nasayran nga daw beauty queen ang dagway sa biktima diin daghang mga netizens ang gisayangan ug nasuko sa posibleng suspek kung kini biktima sa lugos.
Hinuon, wala pa mihatag og pamahayag ang mga kabanay kung diin girespeto ang ilang kabahin diha sa ilang pagsubo karon.