GIKATAKDA sa Aadlaw’ng Pasko ang gikaintapang panagharong sa Los Angeles Lakers ug Los Angeles Clippers sa sunod season sa National Basketball Association (NBA).
Ang duha ka mga kampo mao ang grabeng ninghimo og langas sa miaging free agency market sa NBA diin pareho kining nakabira og superstars.
Nakuha sa Lakers si Anthony Davis gikan sa New Orleans Pelicans aron ikaabag ni LeBron James samtang nakuha sa Clippers si Kawhi Leonard gikan sa champion Toronto Raptors ug Paul George gikan sa Oklahoma City Thunder.
Sa Adlaw’ng Pasko sab naka-eskedyul ang laing gikaintapang engkuwentro tali sa Golden State Warriors ug Houston Rockets. Ang duwa ipahigayon sa bag-ong homecourt sa Warriors nga mao ang Chase Center sa San Francisco.
Magsangka sab sa Adlaw’ng Pasko ang Milwaukee Bucks batok Philadelphia, Toronto Raptors batok Boston Celtics, New Orleans Pelicans batok Denver Nuggets. (Reuters)