NAGKABIKIL ba kaha ang duha ka trainers ni Manny Pacquiao nga sila si Freddie Roach ug Buboy Fernandez?
Basi sa taho sa Manila Bulletin, daw adunay panagbangi sila si Roach ug Fernandez human sa malampuson nilang paggiya sa Pambansang Kamao ng Pilipinas ngadto sa kadaugan batok kang American Keith Thurman niadtong Hulyo 20 sa Las Vegas.
Ning awaya, gipakita ni Pacquiao nga aduna pa siya’y saktong ikabuga bisan nag-edad na siya og 40.
Hinuon nagkanayon si Roach nga siya mismo ang mosugyot sa bugtong 8-division world champion nga moretiro na kon iyang mabatyagan nga nagkaubos na ang abilidad niini.
Apan sa laing interbyu, nagkanayon si Fernandez nga wala’y gahom si Roach kabahin sa pagsugyot kang Pacquiao kon kanus-a kini angay moretiro.
Ang pamahayag ni Fernandez nga nakapapungot kang Roach.
“If I ever see signs of him slowing down, I’d be the first one to say it. Buboy said the other day that I don’t have the power to do that,” matod ni Roach sa Manila Bulletin.
“Buboy, I don’t have the power to do that but my suggestion to him would be honest. I am really pissed off that he said that about me.”
Gipasabot ni Roach nga igo ra siya'ng naglantaw kon unsa'y kaayuhan alang kang Pacquiao, kinsa maoy iyang labing paboritong estudyante.
Gani, mitambag nang daan si Roach nga dili na angayang makigharong ang fighting senator sa duha ka bantan-ong knockout punchers nga sila si Terrence Crawford ug Errol Spence Jr.
Nagkanayon si Roach nga wala na'y angayang pamatud-an si Pacquiao nakaubok nang daan ang legasiya niini sa kalibutan sa boksing. (ESL)