NASUGAMAK sa 1st round submission nga kapildihan ang Pinoy nga si Eduard Folayang batok sa kanhi UFC and Bellator lightweight world champion Eddie Alvarez niadtong Biyernes sa gabii sa ONE: Dawn of Heroes sa Mall of Asia Arena sa Pasay City.
Si Folayang, kinsa kanhi ONE lightweight world champion, unang nakahakot og puntos pinaagi sa iyang mga kumo ug patid nga tatawng nakatay-og kang Alvarez.
Aduna pa’y higayon nga nagtakiang si Alvarez human maigo sa kusog nga patid ni Folayang.
Apan human niini, nakakita’g kahigayunan si Alvarez aron dad-on sa sawog ang away diin nakahimo siya og rear-naked choke hinungdan nga ni-tap si Folayang sa ika-2:16 minutos sa round.
Sa kadaugan, nakaabante si Alvarez sa ONE lightweight world grand prix diin iyang ikaharong si Saygid “Dagi” Arslanaliev. (ESL)