Vallena: Kapuslanan sa biseklita
SA amoang pamilya, tanan kahibawo mobiseklita. Akoang giseguro nga way bisan usa namo nga way alamag sa pagtindak. Akong gihuna-huna nga sa umaabot, labina sa mga katalagman, ang usa sa labing maayong transportasyon nga malungtaron, labing simple nga transportasyon ang biseklita.
Nahinumdom ko sa linog sa Japan niadtong 2011, diin gibana-banang kapin sa 10,000 ang nangamatay. Usa ka survivor nga tiguwang nga babaye nakalingkawas sa tsunami kay duna pa siyay igong panahon sa pagpalayo gikan sa tubig. Kon di pa siya kahibawo motindak, hayan usa siya sa mga casualty.
Di ba nakasuwat ko dinhi kabahin sa akong experience sa bagyong Ruping diin grabe ang kadaut nga nahimo. Daghan kaayong mga poste sa kuryente ang nangatumba. Maglisod sa pag-agi dayon ang mga sakyanan. But ako nakasugakod ra pagbiyahe kay nakapanghuwam ko og road bike sa akong classmate human sa bagyo.
Daghan ang maglisod pagtuo nga ang biseklita makakarga og igong mga gamit. Apan kaya kaayo sa biseklita ang pagkarga kon dunay igong butanganan nga ikab-it sa frame ug ubang parte niini. Dunay mga tawo nga makahimo kaayo niini.
Ang Oz Racing nagbaligya kaniadto og mga bag nga pangbiseklita nga masudlan og mga gamit alang sa long distance ride.
LONG RIDE
Sa Europe, common ang long distance ride sa mga biker nga hilig og adventure. Bisan diri sa Cebu, dunay mga biker nga endurance riders nga mangtindak og lagyo. Magdala silag mga tolda ug uban pang mga gamit pang biking.
Ako ning gi-stress tungod kay daghan ang nagtuo gihapon nga ang biseklita pangdug-ol ra. Di makaya ani ang pagbiyahe. Bitaw, hinay ni nga modagan kay human-powered man kini nga transportasyon, apan segurado kang maabot sa imong destinasyon.
Sa teknolohiya karon, mas gaan na tindakan ang biseklita itandi sa kaniadto. Ang imo rang gikinahanglan sa biseklita mao ang bomba sa hangin, tapak sa ligid ug tools nga magamit kon maputol ang kadena.
Naa lang ka ini, ready for a whole year round na ka sa pag ride.
GIBALIWALA
Ang biseklita maoy klase sa transportasyon nga gitan-aw nga ordinaryo. Alang sa uban, ordinaryo ra kaayo. Nahimuot gani ang biking community human makuhaig hulagway si John Lloyd Cruz nga nagbiseklita. Pobre na kuno si John Lloyd, nagkalisod sa pagpuyo kay nagbiseklita na lang.
Nahinumdom dayon ko sa akong kauban sa biseklita nga nadasmagan sa taxi. Wa siya magpabayad sa gasto sa ospital kay biseklita ang iyang pabayran. Sa sinugdan nalipay ang driver, apan pwerte niyang guola pakahibawo sa presyo. Mahal pa kuno diay sa iyang unit.