SUS, pastilan wala gyuy lain nga nahuna-hunaan si Congresswoman Paz Radaza. Daghan unta siyang mahimo pinaagi sa pagpangamahan og balaudnon diin makabenipisyo ang kadaghanan sa mga Oponganon nga maoy iyang gi-representahan. Ang representante sa lone district sa Lapu-Lapu City misang-at og balaudnon nga dili na ipatawag ang isdang lapulapu kay dako kining insulto sa unang bayani nga si Lapu-Lapu kinsa maoy unang nakig-away sa mga langiyaw’ng Espanol nga misakop sa atong nasud ug mihimo natong ulipon.
Sa iyang House Bill No. 2223, ipahunong na ni Congresswoman Paz ang pagtawag sa isdang lapulapu o kining ‘grouper fish’ o ‘plectropomus leopardus’ ang Scientific name. Ipatawag na ni Congresswoman Radaza og ‘Pugapo’ ang lapulapu. Kining maong isda lami kaayo lutuon isip escabetche o steam. Kasagaran kining ma-order sa mga Chinese restaurant.
Section 2 sa maong balaodnon, gi-deklarar nga gidili na ang pagtawag sa isdang Lapu-Lapu. Inay ipatawag na kini og pugapo. Gimanduan usab sa maong balaodnon ang National Historical Commission of the Philippines ug Bureau of Fisheries and Aquatic Resources (BFAR) sa pag-implementar unya sa maong balaod. Walay probisyon kabahin sa multa sa makasupak.
Pangutana: daghan ba ang nakasaway sa pagtawag ning maong isda og lapulapu? Insulto ba kini sa atong unang bayani nga adunay isda nga susama niya og ngalan? Kon mapasar, mapugngan ba ni Radaza ang mga tawo nga motawag sa maong isda nga lapulapu? Wala may silot. Unya sikat naman kaayo ni. Iya bang ipa-priso ang mga mananagat, lab-asera ug ang mga mopalit ingon man ang mga kusinero sa mga restaurant nga mogamit gihapon sa maong pulong?
Pastilan daghan pa kaayo untang mahimo si Congresswoman Paz nga mga balaodnon nga makabenipisyo ang kinabag-ang Oponganon. Mas maayo pang tabangan niya kanang mga manghimoay og firecrackers sa iyang dakbayan nga mamahimong legal ang panginabuhi. O ba kaha kahatagan og representasyon ang Lapu-Lapu City government sa Mactan Cebu International Airport Authority (MCIAA) ug mabahinan ang city government sa kita sa MCIAA. Hinanggaw ning maong balaudnon.(bobbygnalzaro@gmail.com)