MALIPAYON ang akong mga higala diha sa Bureau of Customs dihang nilabaw og P103,435,848 ang ilang koleksyon sa buwan sa Hunyo kon itandi sa collection target nga P2,841,093,617. Ubos na kini sa pamunoan ni Acting District Collector Charlito Mendoza.
Wa pa gyud nako mahimamat kini si Collector Mendoza apan daghan kog nadunggan nga maayong mga buhat sulod lang sa buwan sa Hunyo dihang ni-take over siya sa kanhi district collector nga si Elvira Cruz.
Atong nasayran nga giumentohan ang collection target sa Cebu Customs og P47 milyones. Apan yano kaayo kining gipalabwan dayon ni District Collector Mendoza.
Lalim bay niabot og P2,944,529,465 ang koleksyon sa bureau karong Hunyo?
Dihang nangutana kita kon giunsa niya kini pagkab-ot, atong nasuta nga nisandig siya sa mga beteranong sinaligan sulod sa bureau nga sila si Rady Abarintos, Elmer Bailio (nga bag-ong gi-promote), Peter Paul Fenix, and Deputy Collector Lemuel Romero.
Usbon nako og sulti dinhi ang gisulti sa akong anhing amahan nga nag-cover sab sa bureau pipila na ka dekada nga nilabay. Kon mosaka pag-ayo ang koleksyon, grabing moubos sab ang pangurakot sa bureau.
Acting District Collector Mendoza is on the right track.
Sa laing bahin, atong gipaabot ang pagbalik ni Collector Gerry Campo isip Mactan Sub-Port Collector.
Kahinumdoman, mao kini ang collector nga gisuwayan sa pagpatay duol sa iyang balay dinhi sa Syudad sa Talisay tungod sa kaligdong. Atong nasayran niadtong tungora nga wala siya mosugot palutson ang usa ka shipment sa gidiling drugas.
Welcome back, Collector Gerry Campo. Manghinaot kita nga ubos karon sa pamunoan ni District Collector Mendoza ug Commissoner Rey Leonardo Guererro, dili lang malabwan ang collection target, mapaubos pa gyud ang pangurakot sulod sa Bureau of Customs.
WAY ADIK
Nalipay sab kita nga nasutang walay adik diha sa Lapu-Lapu City Hall human sa nagpa-ubos og drug test si Mayor Ahong Chan ug 374 ka mga kawani, basi sa taho ni Garry Lao, bag-ong hepe sa Anti-Drug and Substance Abuse Council (ADAC) sa maong syudad.
Angay lang nga unahon gyud ni Mayor Chan pagsiguro nga ang iyang work force walay bahid sa gidiling drugas labi na nga dako-dako ang suliran sa maong syudad.
Wala siya mohulat nga dunay moingon kaniya nga buhaton kini. Di pareho sa usa ka kanhi mayor sa laing syudad dinhi sa Sugbo nga dugay kaayong nakadesisyon magpa-drug test. Gipasiawan hinuon nga maoy nakahurot sa gatas nga Alpine. Hahaha!
Manghinaot lang gyud kita nga makuha ni Mayor Chan ang kooperasyon sa Konseho diin mayorya naa sa iyang kaatbang nga Partido. (@anol_cebu sa Twitter)