TUNGOD sa kahunas, nasangad sa kadagatan sa Lauis Ledge Light House, sa Dakbayan sa Talisay, ang usa ka foreign cargo vessel sa Sabado sa buntag nga paingon unta sa Cebu International Port sa dakbayan sa Sugbo.
Ang MV ARIKUN diin aduna’y sakay nga 18 ka langyaw nga mga tripolante, wala makalahos sa CIP.
Alas 7:30 sa buntag kagahapon, Sabado dihang nakadawat og taho ang Coast Guard Cebu kabahin sa cargo vessel.
Nasayran nga gikan sa dakbayan sa Davao ang barko nga karga ang 4,210 ka tonelada sa trigo o wheat.
“On 07:32am of the same date, Coast Guard Aduana, Port State Control, Medical Team, Marine Environmental Protection Unit and Coast Guard diver immediately responded and went to the said area to render assistance,” tipik sa report sa Coast Guard Central Visayas pinaagi sa tigpamaba niini nga si Lieutenant Junior Grade Michael John Encina.
Mga tripolante naglangkob sa 13 ka Chinese, 3 Vietnamese, ug 2 Burmese Nationals.
Wa hinuoy naangol ug negatibo ang oil spill sa dapit.
Alas 11:00 sa buntag dihang nitaob ug daling gidala ang cargo vessel sa Talisay anchorage.
Base sa port state control inspection, legal hinuon ang dokumento sa barko apan gipahamtangan gihapon kini og deficiency report tungod sa pagkasangad.
Gikinahanglan usab nga ipaubos sa underwater hull inspection ang barko sa di pa pabiyahion. (HBL)