SECTIONS
Sunday, September 15, 2019
SUPERBALITA CEBU

Editoryal: Unsaon pagpatay

Editorial Cartoon by John Gilbert Manantan

SUNODSUNOD ang mga pagpamatay sa Negros Oriental. Nagsugod ni human patya sa mga rebeldeng New People’s Army (NPA) ang upat ka mga pulis sa lungsod sa Ayungon. Giingon nga susama og summary execution ang gihimo sa mga NPA.

Kapin sa 10 na ka mga tawo ang gipatay human sa hitabo.

Tungod niini, dunay posibilidad nga modeklarar si Presidente Rodrigo Duterte og martial law sa Negros Oriental o sa tibuok isla sa Negros, nga maglakip na sa Negros Occidental.

Nagtuo si Duterte nga mao kini ang solusyon sa pagpuhag sa mga rebeldeng NPA.

Bisan dunay epekto ang mga military operation batok sa armadong grupo sa mga rebelde, di armas ang hingpit nga makapuhag sa rebelyon. Ang simple nga problema wa magkinahanglan og komplikadong solusyon. Ang komunistang rebelyon mas simple kay sa Muslim rebellion.

Ang solusyon mao ang ekonomikanhong pagpalambo ug pagrespeto sa tawhanong katungod. Palamboa ang usa ka dapit, mamatay ang rebelyon kay mahanaw ang suporta sa katawhan kanila. Sama sa usa ka isda, kuhai sa tubig, di ba mamatay?

Husto kaayo si Gobernador Gwen Garcia sa iyang pag-ingon nga kon ang mga chief executive mosuporta sa hingpit sa kagamhanan, mamatay ra sa naandang paagi ang rebelyon.

Ang suporta maglakip sa di paghatag og kapasilungan sa mga rebelde, di paghatag og pundo kon sila mangayo, ug paghatag sa batakang serbisyo sa komunidad diin maglublob ang mga rebelde.

Kon wa silay suporta sa komunidad, mapugos sila sa paghawa sa dapit. Ang combatant nga duna nay alternatibong panginabuhi aron ikapakaon sa pamilya, mobiya sa armadong pakigbisog.

Tungod sa ekonomikanhong kalamboan sa Sugbo, napapas ang mga rebelde dinhi.

Di mapuhag ang rebelyon sa armas. Tinud-anay nga serbisyo ug ekonomikanhong kalamboan ang motuldok niini.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph