WA DAMHA nga ang kanhi kalingawan niyang maggunting-gunting ug mangolekta og mga cutouts gikan sa newspapers ug magazines dihang bata pa siya nakatabang kang Kenny Andrade Ladaga nga madasig siyang mas maningkamot, ug karon usa siya sa respetadong local designers, nga mikulit na sab og ngalan sa local ug international fashion scene.
Si Ladaga, 32, mipaambit sa SunStar Davao nga dihang bata pa siya, ang amahan niyang si Delfin Ladaga, usa ka police captain, dakong kontra sa iyang pagka-bayot.
Niya, motago siya sa panahon nga magduwa siya og duwaan alang babaye, sama sa Barbie dolls aron di masuko ang amahan.
Dinhi nagsugod ang iyang pagkamamugnaon.
“I started drawing and making sketches since I was in grade school. I spent my weekends cutting out sketches from fashion magazine and newspapers. During that time, I already knew I wanted to pursue my passion and to be a fashion designer,” suma niya.
Human migradwar og high school, buot niyang mokuha og Fashion Design o Fine arts, apan tungod sa pinansiyal nga kalisud nag-enrol siya og Bachelor of Science in Hotel and Restaurant Management (BSHRM) sa Surigao del Sur State University sa Tandag.
Alang niya, maduso lang ang iyang damgo nga motrabaho sa hotel.
Usa ka surpresa nga misulti ang iyang amahan nga human sa iyang gradwasyon sa kolehiyo suporta siya niini sa damgong mahimong fashion designer.
Apan, semana una siya mibiyahe pa-Cebu aron didto magtungha, namatay ang iyang amahan.
Inay nga mawad-an og paglaum, nanimpalad siya sa Davao City ug gisuwayan ang pagsud sa fashion industry.
Mi-aplay siya sa dakong fashion house diin nagsugod siyang assistant.
Parte sa iyang trabaho ang paglimpyo sa shop, magsilbi og kape sa kliyente, plastaron ang kalat sa mga designers, ug uban pa.
Inay moreklamo, ang iyang kasinatian, gihimo niyang sumbanan sa pagkab-ot sa iyang pangandoy.
Iyang gihinumdum ang dakong higayon diin miapil siya sa Sagala Gown Competition 2012 sa SM City Davao.
Kini kompetisyon sa best Filipiniana gown diin siya ang grand winner.
Human niadto misalmot siya sa Moda Mindanao 2012, usa ka ethnic gown competition sa Mindanao designers diin siya sab midaug.
Sa iyang kalampusan sa local fashion competition, nagsugod og pangabot ang mga proposals sa trabaho, hangtud nakadesidar siyang itukod ang Kenny Ladaga Couture sa Davao City.
“By loving your passion, doing good gowns, doon ako napansin internationally. Opportunity... like doing a fashion show abroad. Showcasing my creations,” dugang ni Ladaga.
Ang mga desinyo ni Ladaga na-feature sa lokal ug internasyunal.
Gibalandra niya ang iyang desinyo sa Paris ug Canada, ug uban pang nasud.
Ang iyang mga koleksiyon mipukaw og atensiyon sa mga kliyente nga nagka-interes sa iyang obra.