AKONG gipasalamatan ang Ginoo sa oportunidad nga iyang gihatag kanako nga mahimong kabahin sa Oplan Kalinaw sa atong mga kapulisan sa Toril Police Station, ilawom sa pagdumala ni Lieutenant Colonel Jed Clamor, ang hepe sa maong istasyon.
Kini nga programa maoy gipatuman sa kapulisan sa Davao City Police Office (DCPO) ning tibuok siyudad, sa tumong nga dunay profile ang mga lumulupyo sa matag-sitio, aron ma-monitor ang peace and order sa tibuok dakbayan.
Aduna sab information drive nga kabahin sa kriminalidad, aron matudluan ang katawhan sa mga lihok sa mga kriminal. Apil niini mao ang mga kalihokan sa mga drug syndicates, ug ang mga pag-amping aron dili mabiktima sa rape, kawat, ug uban pa.
Gihimo pod nato sa Toril ang Oplan Kalinaw sa paghatag og ispiritwal nga mga pagpahimangno sa atong katawhan, aron mapadasig sila ngadto sa moralidad.
Kabahin ani mao ang mga maymay alang sa maayo nga panimalay, nga maoy pundasyon sa atong sosyodad.
Niadtong Huwebes, ang programa anaa sa Toril, busa ang mga residente nakahimulos sa mga serbisyo diin ang mga resources nahatag sa katawhan.
Adunay mga representante gikan sa Philippine Drug Enforcement Agency (PDEA) Davao Region, Bureau of Fire Protection (BFP) kinsa ang maong mga buhatan naghatag og pahimangno sa katawhan.
Diha sa’y serbisyo nga libreng gupit, medical services, dental services, lamiang lugaw ug lomi, ug mga gifts gikan sa Police Community Relation (PCR) department sa atong kapulisan.
Gipanalanginan gayod sa Diyos ang malampusong programa, diin ang katawhan labi na sa taga Barangay Bangkas, Toril nagpasalamat sa serbisyo nga dala sa atong kapulisan.
Akong napalandungan nga kung ang atong mga katawhan nakasabot sa pagka-importante sa atong mga kapulisan, sa ilang pagpaningkamot nga mahimong hapsay ug malinawon ang atong mga kumunidad, pasalamatan gayud nato sila.
Atoa untang hunahunaon nga kung walay mga pulis, unsa nalang ang mahitabo sa atong sosyodad?
Ang atong mga kapulisan maoy dalan aron mapabilin gayod ang kahapsay ug kalinaw sa palibot. Dili kita dapat mahadlok kanila, apan ato silang tabangan pinaagi sa pagsunod sa mga balaod sa siyudad ug sa atong nasud.
Tungod nila, makatagamtam kita og kalinaw.