COTABATO CITY -- Gidabdaban sa mga sakop sa Philippine Drug Enforcement Agency (PDEA) sa Bangsamoro Autonomous Region in Muslim Mindanao (Barmm) ang nagkantidad og P15 milyones nga shabu sa pribadong pasilidad, alas 10 sa buntag, Biyernes, Agosto 2, sa probinsiya sa Maguindanao.
Matud ni PDEA-Barmm director Juvenal Azurin nga ang gisunog nga druga narekober sa mga operasyon sa rehiyon sugod 2014, uban ang kapulisan.
Ang pagsunog kabahin sa nasudnong kamandoan sa administrasyon ni Presidente Rodrigo Duterte nga nagtumong nga ipakita sa publiko nga wala gi-recycle ang mga ilegal nga druga.
“We are hurt when people accuse us enforcers of recycling the confiscated items. We have never recycled evidences and stuff confiscated, we kept them inside PDEA evidence room under tight security watch,” pagklaro ni Azurin.
Mga druga gisulod sa insinerator sa planta sa kuryente sa Barangay Simuay, Sultan Kudarat ug gisunog.
Gawas sa shabu, gisunog sab ang mga sinakong marijuana ug mga tambal nga narekober sa operasyon sa PDEA sa Cotabato City, Maguindanao, Lanao del Sur ug Marawi City.
Gisaksihan sa daghang personalidad ang pagsunog sa druga uban ang mga sakop sa media ug ni Judge Kasan Abdulrakman sa Regional Trial Court 12.
“We are in full support of the PDEA campaign. Illegal drugs destroy families and our future generations, who knows they include our families,” segun ni Judge Abdulrakman.
Gipasalig ni Azurin sa publiko nga ang tanang mga ilegal nga druga nga dili na kinahanglan isip ebidensiya sa korte sunugon.
Mga tambal nga sulod sa botelya ug plastic sachet gipaligsan og pison. (Edgar E. Fuerzas)