MIKUSO-KUSO ang dagko nga mga balud sa kadagatan sa Davao Gulf Sabado sa buntag, Agosto 3, nga maoy hinungdan sa pagkaguba sa mga sakayan-pandagat ug pipila ka kabalayan sa Davao City.
Sumala sa Philippine Coast Guard (PCG) Davao nga matag bulan sa Agosto dagko gayod ang mga balud sanglit kini ang panahon sa Hanging Habagat.
Sa pantalan sa Sta. Ana, nangaguba ang tulo ka mga bangka human gikuso-kuso sa dagko nga mga balud.
“Wala nako nabantayan nga motaob ug ubanan pa sa dagko nga balud pagkabuntag, sayang akong sakayan, maglisod nako sa pagpangisda ani kay guba gyud kaayo,” sulti ni Arman Enriquez, 52-anyos.
Pipila sab ka kabalayan sa Barangay 76-A Bucana, sa Barangay Bago Aplaya ug sa Punta Dumalag ang gipangguba sa dagko nga balud.
Sa Barangay 76-A, dunay duha, sa Barangay Bago Aplaya, usa samtang sa Punta Dumalag dunay duha subay sa rekord sa pagpanubay sa Superbalita kagahapon.
Naa na say gihimo nga monitoring ang mga nasampit nga barangay nga duol sa kadagatan.
Kahinumdoman, tuig 2007 ug 2013 sa samang bulan gatusan sab ka mga panimalay ang gipangguba sa mga balud.
Kinatibuk-an niabot og 114 ka mga balay ang nadaut sa kabaybayonan sa unom ka mga barangay sa siyudad sa Davao, kaadlawon kagahapon, Hulyo 3, 2019, base sa datos nga gihatag sa Davao City Disaster and Risk Reduction Management Office (CDRRMO) sukad alas 2 sa hapon kagahapon.
Apil sa mga barangay nga naapektuhan mao ang mga 21-C, 22-C, 23-C, Bago Aplaya, Matina Aplaya, ug Duterte.
Si CDDRMO chief Alfredo Baloran nagtug-an sa SunStar Davao nga mga molupyo nagpuyo sa naapektuhan nga dapit gipahimangnoan sa posibleng pagdako sa mga balud.
“Last month, nag-conduct nami og pulong-pulong sa mga barangays because expected na aning bulana and the coming months, up to October gani ni nga muhapak ang Southwest Monsoon (Hanging Habagat) nga mag-cause og dakong balod. Wala mi nagkulang pahibalo sa ila,” tug-an ni Baloran atol sa paghinabi sa telepono.
Butyag sab niya nga ang City Social Services and Development Office (CSSDO) nagpadala na og kinahanglang tabang ngadto sa mga biktima.
Hinuon, iyang giklaro nga ang siyudad wala maglaum og bisan usang bagyo o low pressure areas.
Matud niya nga ang dagkung balud sa kabaybayonan nagahitabo matag tuig tungod sa Hanging Habagat.
Nagpahimangno ang awtoridad nga gilayong mobakwit sa mga gym sa ilang barangay ugaling masinati ang pagdagko sa mga balud.
Nasayran nga molungtad pa sa bulan sa Septyembre ang Hanging Habagat nga maoy hinungdan sa pagdagko sa mga balud.
Andam sab ang lokal nga kagamhanan sa Davao City pinaagi sa City Social Services and Development Office (CSSDO) sa pagdalit sa pasiunang hinabang alang sa mga biktima sa pagdagko sa balud.
Nakaalerto sab 24-oras ang monitoring sa Central 911 partikular ang Urban Search and Rescue (USAR) sa pagpanubay sa kadagatan ugaling dunay mga mabiktima.
Naka-monitor sab ang PCG-Davao ug gilayon nilang ipang-kanselar ang biyahe sa Davao-Samal nga mga motorized banca ugaling mamatikdan gyud kung makabalda ang dagko nga balud sa paglawig.