POSITIBO sa ilegal nga drugas ang usa ka trabahante sa City Hall nga nasapong nanglabni og celfon niadtong Agusto 1, 2019 sa 12th-21st street, Barangay Nazareth, Cagayan de Oro.
Nasikop si Paul Ampo, 26, nadestino sa City Public Service Office (CPSO) sa City Hall sa tulo ka tuig.
Sa pakighinabi kang Police Major Ericson Sabanal, station commander sa Police Station 9 (PS9) sa Macasandig, gibutyag nga nasapon si Ampo nga gilabni ang celfon ni Gerasil Tanio, 23, taga Ilaya, Carmen.
"Misakay siya sa jeep sa R1 sa montery. Dayon naog sa pasahero, dayon pud siya naog. nasikop dayon nato siya tungod sa atong operatiba sa PS9 ug sa CAPPD," matud ni Sabanal.
Gidugang usab ni Sabanal nga positibo sa ilegal nga drugas ang suspek kinsa gituohang high pa atol sa hitabo.
"Gi-drug test pa nato siya kagahapon kay dili normal iyang paglihok, labi na the way siya mo-talk. So, it turns out nga atong suspect positive sa drugs," dugang pa.
Samtang, gi-angkon usab sa suspek nga iyang gilabni ang mahalong Oppo nga celfon nga nagkantidad og P10,000.
Ang suspetsado kasamtangang anaa sa mini-cell sa kapulisan.