HUMAN malangkat ang ikalimang puwesto sa 2019 Street League Skateboarding World Tour, mihayag ang dalan sa Cebuana skateboarder nga si Margielyn Didal paingon ngadto sa qualifying rankings alang sa 2020 Olympics sa Tokyo, Japan.
“Margie is now fifth in the world. With that result, most likely she’s already in the top 12 of the qualifying for the Olympics,” matod sa skateboarding head sa nasod nga si Monty Mendigoria.
Ang 2018 Asian Games gold medalist mitali og 21.7 puntos sa Los Angeles, California, ang usa sa mga legs sa world tour diin siya ang nakakuha sa pinaka taas nga nakab-ot sa usa ka Pinoy nga global stage.
Si Didal mosalmot pa sa tulo ka world championship events ug kinahanglan nga anaa siya sulod sa top 16 hangtod sa May 2020 aron maka-i sa Tokyo Games.
Matod ni Mendigoria, president sa Skateboarding ug Roller Sports Association of the Philippines, kinahanglan mamintinar ni Didal ang kasamtangang ranking sa dihang ang world tour motadlas na sa Mexico sa November.
Human sa Mexico, laing duha ka legs diin ang lumad nga taga barangay Lahug, dakbayan sa Sugbo makigtigi usab ug posibly usa niini didto sa Japan ipahigayon.
Si Rayssa Leal maoy midominar sa Los Angeles tour sa dihang ang 11-anyos nga taga Brazil mipugnit og 23.3 puntos samtang ang laing Brazilian nga si Pamela Rose ang nagsunod nga may 22.8. Ang Amerikanhon nga si Alana Smith milandig sa ikatulo nga may 22.5 puntos. (JBM)