NITANYAG ang kooperatiba sa mga truck equipment ug quarry operators sa kagamhanan sa lalawigan sa Sugbo nga motambak og yuta sa duha ka dagkong mga lungag diin pabarugon unta ang Provincial Resource Center sud sa compound sa Kapitolyo.
Matod ni Gobernador Gwendolyn Garcia libre nga buhaton sa Visayas Truckers Equipment and Quarry Operators Services Cooperative (VTEQOSC) ang pagtambak sa backfilling materials ug ang ekipo na sa Kapitolyo maoy gamiton sa pagkatag ug pag-compact niini ngadto sa mga lungag.
“Mao nay akong gitawag nga duna pa gyuy mga good Cebuanos, civic-minded Cebuanos nga andam makig-abag sa probinsya aron mahibalik ang Sugbo sa pagka numero uno,” pahayag sa gobernador dihang nahinabi sa mga tigbalita niadtong Biyernes, Agusto 2, 2019.
Apan ila ni i-charge sa WT Construction, Inc. (WTCI) nga maoy contractor unta sa Provincial Resource Center.
“We cannot be waiting forever for him. And if he probably thinks that he will hold us hostage to that, well he better think again. Kay duna nay mga responsible and civic-minded Cebuanos who have offered their help,” dugang sa gobernador nga ang gipasabot ang tag-iya sa WTCI.
Nidugang si Garcia nga sugdan ang pagtambak og yuta sa higayon pormal na sila motubag sa tanyag.
Sa iyang suwat kang Garcia pinetsahan og Agusto 1, 2019, nihangyo si Maurino Roma, chairman sa VTEQOSC, nga tugotan sila makatambak sa kinubkob nga yuta gikan sa ilang lainlaing mga proyekto sa mga siyudad sa Sugbo ug Mandaue.
Ang kooperatiba dunay 40 ka mga miyembro nga nanag-iya og heavy equipment ug dump trucks alang sa ilang construction projects.
Si Garcia nasagmuyo sa WTCI kay hangtod karon wa gihapon sila tubaga niini bisan sa iyang gihatag nga 48 ka oras nga ultimatum.
Tungod niini, gihikay na sa Kapitolyo ang pagpa-blacklist sa WTCI ug gipahibawo na usab niini si Engr. Pericles Dakay, ang vice chairman sa Mactan-Cebu Bridge Management Board.
Si Dakay mao usab presidente sa Philippine Contractors Accreditation Board, ang mohatag og category ug classification sa contractors. (SCG)