MOABOT hangtod sa 100 milyones dolyares ang pasiuna ibubo sa usa ka Chinese nga kompaniya nga interesado motukod og refuse power station sa mga basura sa Sugbo.
Matod ni Gobernador Gwendolyn Garcia mismo si Chinese Consul General Jia Li ang nipahibawo niya atol sa courtesy call niini niadtong Hulyo 5, 2019 sa Kapitolyo, nga interesado ang kompaniya nga magtukod og waste-to-energy (WTE) nga pacilidad sa Sugbo.
Gisulti kini sa Chinese consul human iyang nadunggan nga interesado si Garcia nga magbutang og WTE nga mga planta.
Sigon sa gobernador ang New Sky nga naa na dinhi sa Sugbo ug nalambigit sa garbage disposal, nahuman na sa pasiuna nga feasibility study alang sa posibilidad magbutang og refuse power station nga 800 ka tonelada sa basura ang disposal capacity matag adlaw.
Sigon sa gobernador nga makighinabi sila sa mga opisyal sa kompaniya sa dili madugay ug paminawon kon duna na ba kini napilian nga lugar diin himuon ang proyekto.
Sumala ni Garcia moagi kini sa proseso ug tan-awon nila kon i-build-operate-transfer, build-transfer-operate, unsolicited proposal o bidding.
Samtang, gibutyag sa gobernador nga gitan-aw na nila ang tanang mga dokumento kabahin sa mga propiyedad nga gipangdonar o gipangbaligya sa miaging administrasyon, kon mahimo pa ba kini mabakwi alang sa lalawigan ug sa mga Sugbuanon.
“I want to state this again, nine years nga gobernador ko, as much as possible, we will not sell, we will not donate nor dispose of our properties,” nagkanayon si Garcia.
Siya nidugang, sa iyang pagkawala sa Kapitolyo sud sa unom ka tuig, daghang mga luna ang gipangdonar ug gipangbaligya sa nakalabay nga administrasyon hinungdan nga ilang gitan-aw ang mga dokumento niini. (SCG)