DAGHAN ang natingala nganong gibanatan pag-ayo ni Presidente Rodrigo Duterte si Senador Dick Gordon nga unta kakampi man sila pinaagi sa coalition sa mga political alliance sa senado.
Nagsugod kini sa dihang gisaway ni Gordon ang administrasyong Duterte, nga kadaghanan sa mga gitudlo niya sa mga gabinite mga former military, ug gitumbok niya nga dili kuno maayo, basin unya og ma-militarized ang usa ka ahensiya sa atong gobyerno.
Sayud naman kitang tanan, nga ang motto sa militar “Obey First Before You Complain" butang nga di daw pwede sa civilian authority.
Natingala usab kita kang Gordon nga mura man og natawo kagahapon, tungod kay senador naman siya sa panahon ni Former President Gloria Macapagal-Arroyo ug didto nagsugod nga kadaghanan sa mga gabinite ni Arroyo mga retired police, o retired military, ug nganong karon paman siya nagkomento?
Nganong daghan kini sila sa panahon ni Arroyo? Bayad sa utang kabubot-on tungod kay military ug sakop sa Philipin National Police (PNP) ang nagbutang niya isip presidente niadtong bugos nga People's Power sa tuig 2001 kun diin gisulong sa military ang Malakanyang aron pakana-ugon si Presidente Joseph Estrada.
Kabahin sa atong presidente, sakto ang iyang gibuhat, gusto siyang mobawi tungod kay sayud kitang tanan nga taga Davao, sa siya pa ang atong mayor sulod sa 22 ka tuig, mas duol ang iyang kasingkasing sa mga rebelde kay sa military, ug gani, gi-angkon niya bisan presidente na siya sa iyang mga diskurso nga kanhi siya rebelde.
Duha ka higayon nga nabati nato sa iyang kanhi programa nga "Gikan sa Masa Para sa Masa" nga matud pa niya, nga mas kampante siya kung mga New People's Army (NPA) ang naa sa iyang palibot kay sa military.
Agi og dugang saksi kita, nga hilabihan kasuod nila ni Leonardo Pitao (A.K.A) Komander Parago, sa dihang napatay sa military gigastuhan niya ang pagpalubong ug hilabihan ka traffic sa tibuok Davao tungod kay ang haya niadto diha man sa Almendras Gym.
Sa laktud gipasidunggan sa atong mayor ang lubong sa pangulo sa rebelde nga adunay 17 ka warrant of arrests.
Hinuon, duna kita’y naani, kay malinawon ang Davao ug wala samuka sa mga rebelde ang Davao tungod kay suod kaayo silang higala.
Karon, wala magdahon ang atong mayor nga sangunan siya sa usa ka posisyon nga mahimong pangulo sa atong nasud, mao nga dinhi mibawi siya, karon bisag ultimo nga sundalo nga mapatay sa rebeldeng NPA, adtuon gyud ni niya ug pasidunggan bisan og tua pa sa hilit nga dapit.
Mibawi lang ang atong presidente sa military nga layo kaayo sa iyang dughan niadtong mayor pa siya sa Davao, karon kay presidente naman siya, kinahanglan dikit gyud siya sa atong armadong kusog.
Matud pa ni Gordon wala daw siya masuko, kay matag usa daw kanato aduna'y katungod sa pagpadayag sa iyang kaugalingong opinyon, pero ang wala hunahunaa ni Gordon nga katungod na sa presidente kung unsa'y iyang prayoridad, sakto ang gisulti sa presidente kang Gordon nga, “pag-presidente una.”