HILABIHAN ang kasubo sa tibuok banay sa pamilyang Maalat human gipatay ang ilang padre de pamilya, Sabado sa hapon atbang sa sabungan sa Carlos P. Garcia Highway, Buhangin Davao City.
Ang biktima mao si Arnold Mascarinas Maalat, 49-anyos, minyo, kanhi Barangay Kapitan sa Barangay Communal, Buhangin District, ning dakbayan.
Sa inisyal nga imbestigasyon sa kapulisan, kalit mibutho ang wa mailhing mamumuno sakay sa motorsiklo dayon gipusil ang biktima ug nahagba kini.
Sa bahin sa Buhangin Police Station, blanko pa sila sa matudlo nga suspek sa krimen, apan ilaha nang gipalawman ang imbestigasyon.
Nasayran subay sa rekord sa awtoridad, si Maalat kanhi napriso sa kalapasan sa Republic Act 9165 kon Comprehensive Dangerous Drugs Act of 2002 niadtong Setiyembre 2017 kinsa nakagawas sa bilanggoan ning tuiga subay sa pag-angkon niini sa plea bargaining agreement.
Sa Davao City, klaro ug dayag kaayo, niadto pa nga kung maduhig ka sa ilegal nga droga, duha ra ang kapaingnan, ang prisohan o di ka ha ang menteryo.
Apan sa bahin sa mga kabanay ug pipila, unta hatagan og higayon ang tawo nga magbag-o, dili dayon hukman og kamatayon.
Natahap dayon ug aduna'y mga pangutana ang mga kabanay kung kinsa ka ha ang mga suspek sa krimen? Ug kinsa ang nagpasugo sa pagpapatay?
Nakaserbisyo na baya sab unta si Maalat sa prisohan nunot sa iyang kaso nga giatubang, ang kulang nalang gyud unta ang pagsabot sa katilingban kung kini nagbag-o ba, kay kung wala, diha na unta mohimo og aksyon.
Pero, lagi kung balaud na ang hisgutan, labi na karon sa administrasyon ni Duterte, di lang kabanay ni Maalat ang nagbangotan apan liboan tibuok nasud subay sa gipatuman nga war on drugs sa gobyerno.
Mapatay gayod sa kapulisan kung mosukol kanila diha sa ilang mga lehetimo nga operasyon, apan sa kaso ni Maalat kini ang palawman gyud sa kapulisan aron masikop ang suspek.
Mo-ampo nalang kita nga matunhay ang ilang paglakaw sa laing kalibutan ug lig-unon ang pagsalig sa kaugalingon sa mga nabilin nga pamilya.