MAGSAYSAY, Davao del Sur -- Buot sa amahan ning lungsod nga mosanay ang mga isda sa ilang kasapaan subay sab sa programa sa Bureau of Fisheries and Aquatic Resources (BFAR).
Gumikan niini gi-awhag ni Mayor Arthur Davin ang Sangguniang Bayan (SB) nga moduso og ordinansa aron patas-an ang multa sa mga masakpang mangoryente og mga isda sa ilang kasapaan.
Matud ni Davin nga anaa lang sa 500 pesos ang kasamtangang multa sa mga mosupak sa balaod mao nga angayan nga amyendahan ang ordinansa aron masigurong di malapas ang balaod.
Giasoy sa mayor nga himuong 1,500 pesos o labaw pa ang gitakdang multa aron di mahilabtan ang mga isda ilabi pa ang mga gagmay nga isda aron mosanay.
Gitahasan sab niini ang kapolisan nga mas palapdan pa ang kampanya sa illegal fishing aron mapasakaan og kaso ang mga mosupak sa balaod.
Samtang, gidawat sab sa mga opisyal ang sugyot sa mayor human nga andam silang mosuporta sa maong kampanya aron di mapasipad-an ang mga isda sa kasapaan.
Ilawom sa balaod sa BFAR hugtanong gidili ang pagpangoryente og isda sa kasapaan nga sagad mahitabo sa kabukiran.