PIKIT, North Cotabato -- Nagkasakit na ang mga bakwit nga mihikling sa nagpadayon nga paglutos sa militar batok sa mga terorista sa Maguindanao utlanan sa North Cotabato.
Sa Pikit, muabot na sa 955 ka pamilya, samtang 317 sab sa probinsiya sa Maguindanao.
Ang mga sibilyang namakwit naggikan sa Sitio Butelin, Barangay Kabasalan, Pikit, North Cotabato ug Barangay Dasawao Shariff Saydona, Mustapha, Maguindanao.
Sentro nga naapektuhan ang mga bakwit sa gilusad nga surgical strike sa Joint Task Force Central sa militar batok sa tulo ka paksyon sa Bangsamoro Islamic Freedom Fighters (BIFF) uban ang unom ka mga langyaw nga terorista nga nagsugod pa niadtong Hulyo 25.
Sa Pikit, gibutyag ni Municipal Disaster Risk and Reduction office (MDRRMO) Head, Tahira Kalantungan, nga ang mga bakwit temporaryo nga namuyo sa mga tulunghaan, mosque ug mga balay sa ilang paryente.
Gawas sa surgical strike sa militar, problema sab sa mga bakwit ang pagbaha gumikan sa nasinating walay puas nga pag-ulan.
Dugang ni Kalantungan nga nagpaabot na og tabang ang lokal nga kagamhanan sa Pikit ang mga bakwit.
Samtang, gi-apud apod na sab ni Maguindanao Governor Bai Mariam Sangki Mangudadatu sa Bangsamoro Autonomous Region in Muslim Mindanao (BARMM)-Government og relief goods sa mga pamilya nga mihikling sa probinsiya.
Sa kasamtangan, gipalig-on pa sa Joint Task Force Central nga gipangulohan ni 6th ID Chief, Major General Diosdado Carreon ang paglutos sa BIFF sa Maguindanao.