MATALAM, North Cotabato -- Nadakpan sa anti-drug operation sa mga awtoridad ang usa ka lalaki nga nagpaila nga paryente ni KZ Tandingan alas 12:05 sa udto niadtong adlaw nga Sabado sa probinsiya sa Cotabato.
Giila ang suspek nga si Eric Tandingan Tocmo, 27-anyos, ulitawo, usa ka fowl breeder sa manok ug nagpuyo sa Purok Bangus, Brgy. Dawis, Digos City.
Sa taho gikan sa Cotabato Police Provincial Office nga samtang nag-deliver og manok ang suspek sa Barangay Poblacion, Matalam, North Cotabato namaligya sab siya og shabu.
Sa diha nga akto na nga itunol ni Tocmo ang shabu ngadto sa asset sa pulis, didto na siya gidakop.
Narekober sa posisyon sa suspek ang upat ka pakite sa shabu og marked money nga gigamit sa mga pulis sa operasyon.
Ang suspek dugay na nga gipanid-an sa mga awtoridad sa pagkalambigit niini sa illegal drug trade sa North Cotabato ug Digos City.
Gikatakda nga isang-at ang kaso batok kang Tocmo nga adunay kalapasan sa Republic Act 9165 o Comprehensive Dangerous Drugs Act of 2002.