GILAYONG mi-eksena ang 'Kusina ng Bayan' sa Davao City Social Services and Development Office (CSSDO) sa mga covered court diin asa nagtinir ang mga nagub-an og balay daplin sa kadagatan sa Davao City niadtong Sabado sa kadlawon.
Ang Kusina ng Bayan usa ka mobile kitchen sa lokal nga kagamhanan ning siyudad.
Tumong sa maong buhatan nga mahatagan og pasiunang tabang sama sa pagpakaon ang mga biktima sa kalamidad.
Sumala sa CSSDO, gidesinyo kini aron sa dali lang maadtoan ang mga dapit diin asa nagtinir ang mga bakwit
Kagahapon, miadto ang Kusina ng Bayan sa Barangay 21-C Gym ug sa covered court sa Barangay 76-A.
Kahinumdoman nga gatusan ka mga tawo nga maoy tag-iya sa 114 ka mga balay daplin sa dagat ang gipanglampurnas sa dagkong mga balud bunga sa Hanging Habagat inubanan sa Bagyong Hanna.