ANG pag-unos ug pagbundak sa kusog nga uwan normal nga sitwasyon ning Agusto. Mao kini buwan nga hingpit na ang ting-uwan ug pagkusog sa hanging habagat. Risgo ang panghitabo ug trahedya sama sa pagdahili sa yuta, baha ug paghuros sa kusog nga hangin. Kinabuhi ug kabtangan maangin sa pagkaguba.
Masuwayan ning panahona kon epektibo o kahuyang ang pagpangandam sa mga lokal nga kagamhanan bahin sa taudtaod nang problema sa sistema sa kanal o drainage.
Ang pagtubag sa mga emerhensiya. Labaw sa tanan, ang paghatag og igong pasidaan sa publiko labi na ning grabeng kausaban sa panahon nga mugna sa climate change.
Masinati ang abnormal nga gikusgon sa mga bagyo, pagbunok sa uwan ug huros sa hangin. Mas lisod nga pagbanabana sa panahon sa tungod sa dili kasagaran nga kalit nga pag-usab sa dagan niini. Mao kini hinungdan nga kinahanglan nga maniid ug sensitibo sa plano nga mobiyahe sa kadagatan, bisan sa abyon tansportasyon sa kinatibuk-an.
Dunay kalit nga pagmando sa pagsuspenso sa biyahe. Posible nga matanggong. Mas kon naa sa laing lugar. Kon andam ka kanunay sa daghang posibilidad, kaminosan ang kabalaka ug malikayan ang risgo sa kinabuhi.
Atong gihisgotan kini nunot sa pagbanabana sa weather bureau Pagasa sa posibilidad nga upat ka mga bagyo ang mosulod sa Agusto. Sumala sa Pagasa, ang hinungdan sa pagkusog sa habagat ug pag-uwan mugna sa bagyong ‘Hanna’ nga tua sa gawas nga bahin sa amihanang tumoy sa nasod.
Makita usab nato ang kadagko bawod sa kadagatan. Gikataho nga dunay dul-an sa napulo nga taga Barangay Ermita, dakbayan sa Sugbo nga naapil sa pagkalunod sa motor banca sa Guimaras niadtong Sabado, Agusto 2.
Importante kaayo ang pagpangandam ug aktibong pagbantay alang sa pagbiyahe o kalkuladong lakang ning panahona.