NAHABWA ang tinae sa usa ka amahan human giluba ang kaugalingon niadtong Miyerkules mga alas 9:00 sa gabii sa Barangay San Isidro lungsod sa Talakag, Bukidnon.

Misuway paghunos sa kaugalingon si Wendel Barasan, 26, minyo, sulod mismo sa puloy-anan.

Gisaysay sa asawa nga gikan nag-inom ang iyang bana ug miuli sa puloy-anan nga gabii na hinungdan nga gikonpronta dili lamang ang asawa apil sa apuhan niini kung asa kini gikan ug nganong hubog nga miuli.

Apan wala motingog si Barasan ug mibarag kining mipaingon sa kusina nga bahin ug kalit lang nga mikuha ug kutsilyo dayon giluba ug gihiwa ang tiyan hinungdan sa pagkahabwa sa tinae niini.

Gisunod sa asawa ang biktima aron yawyawan apan nakurat sa gihimo sa iyang bana hinungdan nga gikuha gikan niini ang kutsilyo ug gitabang.

Dali dayon nga gibiyahe ug gidala sa Northern Mindanao Medical Center ning siyudad sa Cagayan de Oro si Barasan apan kritikal ang kondisyon niini labina nga daghan ang dugo nga nawala.

Matud sa asawa nga namatikdan niya nga dali lang kaayo nga magmahay kung kasab-an ug kung tambagan ang iyang bana dayon dili na motingog ug kanunay maghinuktok.

Gituohang usa sa hinungdan sa pagsuway niini og hunos sa kaugalingong kinabuhi mao ang ilang kapobrehon.