Catap-Lacson: Kailangang isundu

MANYAD ku pung dakal panupaya lalu na kareng taung ekspertu king pamanyalita ampo pamanyulat gamit ing kekatamung lenguaheng Kapampangan. Pauli ning selebrasyun yamu ngening bulan ning wika, sikanan ku pu ing kakung lub na subukang sumulat gamit ing kekatang pakamal a amanung sisuan.

King milabas kung column, abanggit ku nung makananu kaulaga ing bayung kagigiliwan tamung Atching Pacing king Facebook, mamye tula kekatamu ngan. Kelingwan kula namang banggitan deng miyayaliwang grupo kalupa ning We the Lokal ampo ing Where Pampanga? na magpasikat mu naman gamit ing kekatamung amanu.

Pasibayu, dakal pung salamat kareng taung areti, lalu na kang Direk Jason Paul Laxamana na kaiskwela at kakursu kung BroadComm king UP CMC, Carlo Cabi a talagang mamye mu naman tula kekatamu ngan, ampo kareng dakal pang tau at organisasyun na magpalaganap king pamanyalitang Kapampangan.

Aminan ku pung metung ku kareng pengaring e asundu ing pamanyalitang Kapampangan kareng anak ku. Masakit man aminan pero kanita, inisip ku na mas makasalese karing anak ku na mabiyasang Tagalug manibat anak la pamu banta ela magkasakit makipagsalita potang dagul la.

Metung pa niti, mengapaburen la naman kareng iPad king maranun a edad kung kaya mas mebiyasa lang mag-Ingles kesa king Kapampangan. Tabalu pin obat mo isip tamu asno kagaling ding anak patse kasabi talang Ingles samantalang ela rugu makaintindi ampo makapanyalitang Kapampangan. O ngeni ku balamu sisisi obat mipalyari kareng anak ku ini.

E bali, sabi da pin, epa naman talwi ing egana-gana. Pwede pa naman subukan ituru ditak-ditak, bagya-bagya karela deng amanung Kapampangan. Sabi da ing teknolohiya ampo ing bayung panaun iyang megdulut king pamangalingwan tamu king kekatamung sariling amanu, pauli ning Internet ampo reng alben tamung miyayaliwang pelikulang banyaga, deng bayung henerasyun ede akakwang akilalang mumuna ing sarili dang wikang Kapampangan.

Pero, ikit tamu na king gagawan da ri Direk Jason ampo reng dakal a biyasang Kapampangan vloggers, pwede yang gamitan ing makabayung teknolohiya ban palaganapan ampo pakamalan ing kekatamung amanung sisuan. Bilang pengari kareng kekatamung anak, itamu ing mumunang maki-responsibilidad ban mituru lang manyalita king kekatamung kaluguran a salita. Iti, metung yang halimbawa nung makananu tamung maging dayuhan king kekatamung sariling lugal, king kekatamung probinsyang tibuan.

Eta sa kakalingwan ing sinabi ng Gat Jose Rizal: “Ing e biyasang lugud king sariling amanu, mas mabuluk yapa king malansang asan.”

Ing Kapampangan, ing kekatamung amanung sisuan, talagang manyaman yang pakiramdaman ampo gagamitan. Isundu taya, ituru tala ring kayanakan na pakamalan ampo pagmasusian ban kanita, iti miras yapa king dakal pang tutuking henerasyun ning mangalagu, mangasanting, ampong mangaganakang taung Kapampangan.

Kapampangan ku, pagmaragul ku!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph