KARONG adlawa, Martes, Agusto 6, naa silang Nadine Lustre, Sam Concepcion ug Karencitta sa Sugbo alang sa red carpet screening sa ilang pelikulang “Indak.”
Unsang orasa? alas 7 sa gabii sa SM City Cebu.
Ang “Indak” sa Viva Films usa ka dance-musical nga gi-shoot sa Isla sa Bantayan ug sa Seoul Korea.
Ang regular showing ani ugma. Wa pa gani ko kakita sad sa “Hello, Love, Goodbye.” Nindot kuno!
Ganahan ko motan-aw pero wa pa’y time. Wa pa sa’y budget. Haha.. Unsaon.
Yamyam
Unsa gani atong fearless forecast sa Pinoy Big Brother Otso? Sa July 16, 2019 sa Tagming column di ba niingon ko:
“Sunodsunod karon ang mga pasabog sa Pinoy Big Brother Otso. Pero klarong modaug ana sa Big Night ang Bisaya. Kinsa? Si Yamyam! Tan-awa niya di ba moingon gyud mo nako nga nakatag-an lagi ka AC Martin. Siyempre.”
Ug wa gyud masayup ang atong bolang Kristal. Hehe...
Siguradong lipay kaayo si inday Nora Carin sa kadaugan sa iyang higalang si Yamyam Gucong nga maoy Big Winner sa PBB Otso.
Sa Nora ang nitug-an nako nga sa dihang nagbantay pa siya sa iyang pag-umangkon sa Sacred Heart School-Hijas de Jesus nga anaa mahimutang luyo sa Cebu Doc, anha kuno siya mag-estambayan ug magpaabot atbang sa maong eskwelahan.
Dinhi niya nahimamat ug nahimong higala si Yamyam Gucong nga maoy tindero, dishwasher ug all-around boy sa maong kan-anan sa intsik niadtong 2015. Ang ilang litrato nigawas dinhi sa Laysho pag-Abril 23, 2019.
Si Nora Carin ang usa sa mga orihinal texter nato sa Tagming dihang nauso pa ang text messages sa Superbalita.
Salamat sa pag-share Nor. Atong panghinauton ang kalampusan ni Yamyam. From Maymay to Yamyam. Perfect!
25 na ta!
Atangi sa Laysho ang atong balik-raffle sa anniversary promo sa Superbalita.
Ug kay mag-25 na katuig ang inyong kinaham nga mantalaan, 25 sad kabuok ang atong winners. Daghana no!
Unsay atong premyo? Inyo nang mahibaw-an sa sunod natong Tagming, ming, ming, ming...