KANHI bikil ang hinungdan nganong gipatay ang usa ka tawo sa usa ka trisikad drayber sa alas 8:30 sa gabii niadtong Miyerkules didto sa Barangay 76-A Bucana, siyudad sa Davao.

Ang biktima mao si Jerry Lad Kilat, 39, minyo samtang ang suspetsado mao si Rey Andicristo, 34, trisikad drayber, pulos nagpuyo sa Purok 12, Barangay 76-A Bucana.

Base sa blotter sa San Pedro Police Station, nagkalalis ang biktima ug suspetsado sa wala pa mahitabo ang pagpanunggab didto sa ilang lugar, sigun sa awasa sa biktima nga si Josephine Kilat, 32.

Si Andicristo giingon nga mipauli sa ilang balay human sa panaglalis samtang si Kilat misulod sab sa ilang balay aron mopahulay.

Pipila ka minuto ang milabay mibalik ang suspetsado ug misulod sa balay sa biktima diin nahitabo ang pagpanunggab.

Si Josephine misulay pagsanta sa suspetsado apan gidunggab siya tumong sa tuong bukton mao nga gidala sila didto sa Davao Medical Center (DMC).

Si Jerry gideklara sa mga doktor nga dead on arrival samtang si Josephine gidala sa observation room.

Samtang gidala ang mga biktima sa DMC, ang suspetsado daling mibiya sa ilang lugar mao nga gipangita siya karon sa kapulisan. (AD)