USA ka habal-habal driver ang nadala sa ospital human gidunggab sa tulo ka wa mailhing mga lalaking mitulis kaniya didto sa Barangay Little Panay, dakbayan sa Panabo, Miyerkules sa kaadlawon.
Giila ang biktima nga mao si Jade Mark Acleo, 18, ug molupyo sa Puork 20, Montalban Compound, Barangay San Vicente, siyudad sa Panabo.
Sumala sa report gikan sa Panabo City Police Station nga pasado alas 12:30 sa kaadlawon, tulo ka wa mailhing mga suspetsado ang mipara sa sakyanan sa biktima didto sa may Bongkawil Subdivision, Barangay Sto. Niño.
Nagpahatud ang mga lalaki didto sa Barangay Panay sakay sa motor sa biktima.
Apan pag-abot sa nahisgutang dapit, inay bayad ang ihatag sa mga suspek sa biktima, kalit lamang siyang gidunggab gamit ang kutsilyo.
Wa nay nahimo ang biktima sa dihang gikuha sa mga suspek ang iyang cellphone tungod sa nagping-it na siya sa kasakit. Mga suspek misibat sab dayon padulong sa wa matino nga lugar.
Ang biktima nahiagum og samad dinunggaban sa iyang kilid ug daling gidala sa Rivera Hospital sa siyudad sa Panabo.
Matud pa sa biktima nga wa gayod siya nakaila sa mga suspek apan kung ugaling iyaha pa kining makit-an pag-usab mailhan niya sila.
Kapulisan sa siyudad sa Panabo mihimo na og dugang imbistigasyon sa hitabo.
Gilusad na karon ang manhunt operation batok sa mga suspek.(Marvin Pineda)