MGA kaalyadong kompanya nga namatigayon sa San Fernando mihatag og usa ka service bus sa Department of Education (DepEd) nga magamit sa inadlaw-adlaw nga kalihukan sa district office niini sa lungsod ug sa mga tulunghaang gilantaw niini.
Gitunol sa Taiheiyo Cement Philippines, Inc. (TCPI) ug sa tigsangkap niini’g mga minirales nga Solid Earth Development Corp. (SEDC) ang maong bus ngadto sa DepEd ni’ng bag-o pa lang didto sa San Fernando Central School nga gitambongan ni Mayor Lakambini Reluya.
Giangkon sa mayor nga bilihon alang kaniya ang bus kay ang na-anhing niyang bana nga si Ricardo “Nonoy” Reluya, Jr. maoy mi-asikaso sa maong donasyon alang sa mga publikong tulunghaan sa lungsod isip pangulo sa Association of Barangays Councils (ABC).
Usa ka mini-bus nga nagdagan sa upat ka silindrong makinang Isuzu 4HF1 nga naggamit og krudo sa 50-litro nga tangke, makapasakay kini og 40 ka pasaherong naglingkod, matod ni Vanessa N. Bongcawil, nagduma sa TCPI community and general affairs.
Gihangop ni Dr. Victor A. Ybañez, ang lokal nga DepEd district supervisor, ang pagdawat sa maong bus. Nabatyagan gilayon niya sa pagsugod pa lang sa pagpangatungdanan ang dakong panginahanglanon nga daling makalihoklihok ang distrito.
“Uban sa kasayon ug kahupayan, maka-adto na ta sa mga tulunghaan, makatapok sa mga magtutudlo ug mga tinunan alang sa mga kalihukan gawas sa tulunghaan, sama sa mga educational trips, ug makapadala’g delegasyon alang sa mga kalihukan sa probinsya ug rehiyon,” siya mipadayag.
Gipamahayag sab ni Chiyuki Sugawara, senior vice president for operations ug tagduma sa planta sa TCPI, nga ang donasyon nagsubay sa pagtuo sa kompanya nga “ang pamatigayon labaw pa sa paningkamot sa ekonomiya.”
“Sa atong tinguha sa pagpalambo sa pamatigayon, gihiusa nato ang alatimanong katilingban ug kalikupan sa atong operasyon ug pakig-alayon sa atong mga hingtungdan... harun mosugnod ug sugnoran pa ang paglaum sa atong mga silingan,” siya midugang.
Gihimug-atan sab ni Shigeki Koide, luyo-luyong pangulo sa TCPI alang sa administrasyon, ang donasyon nga “pagpadayag sa katim-os sa panaad sa kompanya alang sa pagtukod og mas maayo nga mga komunidad.”
Namahayag pinaagi kang Samuel O. Tagsip, tagduma sa mining operations division sa SEDC, gikutlo sa pangulo sa kompanya Dennis Tenefrancia nga ang donasyon nagpakita sa “atong taas nga pagtahud sa mga magtutdlo.”
“Mahinungdanon ang papel sa atong mga magtutudlo sa paghulma sa mga kabataan ngadto sa pagka-responsible ug produktibong lungsuranon,” siya miingon.
Midugang siya nga ang bus “modasig sa atong mga magtutdlo nga palambuon pa ang ilang katakos sa pagpanudlo harun ma-ugmad gyud ang katakos sab sa mga tinun-an,” dugang niya. (PR)