BASTA magkugi sa kaugalingon sa pagpanarbaho ug motabang sa mga nanginahanglan, ang Ginuo anaa maggiya nimo.
Pinaagi sa pagpangayo og motor ug pagpamaligya og motor parts, niasenso ang pamilya ni Jerby Linao, 46, taga siyudad sa Lapu-Lapu.
Tungod niini nga klase sa panginabuhian, napahuman og eskwela sa kolehiyo sa 46 anyos nga padre de pamilya ang tulo sa iyang upat ka mga anak: sila si Jean Mary, 23, nitapos sa kursong hotel management; Jerline, 22, office staff sa usa ka souvenir shop; ug Jamaica, 20, nagtudlo sa pinulungang English sa mga langyaw.
Ang iyang asawa nga si Carolina Moreno-Linao, 48, maoy iyang katambayayong sa negosyo.
Ang ilang kamaguwangan nga anak, si Jecarl, 27, nagnegosyo og pagkaon.
Moabot sa P150 ang iyang charge kon ipa-tune up ang motorsiklo, diin limpyohan ang karborador ug barbula, samtang P900 kon i-overhaul o mag-agad kon unsay guba sa motorsiklo.
Diin makat-on mangayo og motor?
Matod ni Jerby, nakat-on siya pinaagi sa pag-obserbar kon unsaon pag-ayo sa motor dihang nahimo sila nga subcontractor sa Norkis sa iyang amahan og mga pisa sa motorsiklo niadtong 1980 hangtod sa 2000 kun 20 ka tuig.
Dihang naundang og trabaho sa Norkis, nakatrabaho usab siya sa Mactan Export Processing Zone sa Lapu-Lapu sud sa usa ka tuig niadtong 2002, kansang mga produkto sports wear.
Human niini, nagnegosyo sila og sari-sari nga pagkaon ug nag-asal usab sila og baboy ug manok.
Niadtong 2010, nagsugod si Jerby sa iyang gamay nga negosyo pinaagi sa pagpamaligya og motor parts ug tig-ayo, tig-overhaul, ug tigtaod og accessories sa motor.
Nag-edad pa lang siya og 35 niadtong higayona.
“Gigamit nako akong talento sa pagpangayo og motor. Gi-focus nako akong kaugalingon unya nitan-aw gyud ko sa una unsaon pag-ayo hangtod nakat-on ko,” paambit ni Jerby.
Nakapundar usab siya og balay ug ilang mga motorsiklo tungod niini.
Matag adlaw, labing minos P2,000 ngadto sa P3,000 ang iyang makita sa iyang negosyo.
Karon, nilambo ang iyang negosyo ug naa na siyay kaugalingon nga motor shop duol sa Marcelo Fernan Bridge sa Barangay Pusok, Lapu-Lapu.
Si Jerby, presidente sa New Bridge Riders nga gilangkoban og kapin sa 300 ka mga miyembro.
Ang grupo nga natukod niadtong 2010, motabang sa mga nanginahanglan sama sa magpa-feeding sa mga kabos labi na sa mga nasunogan.
Aduna usab sila ride for a cause kausa sa matag duha ka buwan, diin mag-amot-amot ang mga miyembro ug ang matigom nga kwarta ipaambit ngadto sa uban.
Aduna usab sila kawsa diin ilang tudloan ang mga motorista sa insaktong disiplina sa pagmaneho sa kadalanan, unsay mga angay ug dili angay nga buhaton ug motuman sa mga lagda sa trapiko.
Gidasig ni Jerby ang uban nga maningkamot sa ilang kaugalingon alang sa kaugmaon sa ilang pamilya ug mopaambit sa ilang grasya ngadto sa uban.