USA ka ginang gipusil patay samtang sakay sa usa ka electric trike (e-trike) sa Sitio Bayotan, Barangay Duljo Fatima, Dakbayan sa Sugbo alas 2:30 sa Lunes sa hapon, Agusto 5.
Ang biktima giila nga si Marlina Balacy Cabellon, 60, lumad nga taga Lazi, Siquijor, apan kasamtangan nga nagpuyo sa All Season, Barangay Cogon Pardo, Siyudad sa Sugbo.
Sigun sa imbestigasyon sa kapulisan nga samtang nagsakay sa e-trike si Cabellon, niabot ang wa mailhing tawo, dayong pusil sa luyong bahin sa liog niini nga miresulta sa hinanali nga kamatayon.
Ang anak ni Cabelllon nga nasayod sa hitabo dali nga miadto sa dapit nga nahitaboan.
Nitug-an kini sa mga imbestigador nga nagpahibawo ang ilang inahan nga moadto sa Duljo Fatima kay adunay kuhaon nga cellular phone.
Wa usab sila masayod kinsa ang iyang bisitahon apan aduna kini kapuyo kaniadto nga nagpuyo sa sitio Bayutan nga maoy ipatawag sa Mambaling Police Station. Ahente og pahumot ug pagwapa si Cabellon.
Aduna siyay mga customer sa dapit. (AYB)